EDITORYAL - Mikakak ang Iran

Nakaginhawa og tarong ang tanan niining kalamboan sa Middle East nunot sa pagbawos sa Iran sa US didto sa Iraq.

Samtang makalilisang ang bawos sa mga missiles sa Iran ngadto sa usa ka airbase nga gigamit sa US ug Iraqis, way nangaigo nga mga tawo gawas lang sa pipila ka mga buildings ug gamit nga naigo.

Ang nagkadaiyang mga eksperto sa Middle East miingon nga dili katuohang kadto lang ang bawos gikan sa Iran tungod sa pagpatay sa US sa ilang tinahod nga Quds commander nga si Qassem Soleimani ug sa kaubang pro-Iran Iraqi militia leader Abu Mahdu al-Muhandis.

Ang bawos sa Iran igo ra pagsalbar sa ilang dungog ug dili aron padak-on ang tensyon bisan pa man sa mga bahad nga gibuhian sa ilang lider nga si Ayatollah Ali Khamenei nga mobanaw ang dugo sa Amerika ug mga kaalyado niini tungod sa pagpatay kang Solemanie.

Samtang adunay mga pagdudang dunay nahitabong “backdoor” nga negosasyon tali sa duha ka nasud maayo na kini nga kalamboan nungka mas grabe pa untang giyera.

Wala sab magpasabot nga mahunong na kining mga mahait nga binayloay sa mga pamahayag gikan sa mga kadagkoan sa duha ka nasud.

Bisan di pa nila angkonon masabot nga nakahibalo ang liderato sa Iran wala silay dag-anan batok sa Amerika. Kay kun kumbinsido silang modaug kun ilang hagiton og giyera ang US, dili lang kadto ang ilang buhaton.

Apan, wala sab kini nagsababot nga wala nay mapaabot nga pag-atake ang US ug mga kaalyado niini diha sa ME tungod kay naa pay mga proxies o mga armadong organisasyon nga gisuportahan sa Iran nga mahimong mobawos para kanila.

Ang Iran mobalik ra sa kaniadto nila posisyon, manghimakak og kalambigitan sa mga pag-atake. Sama sa mga pagatake kaniadto nga gimugna ni Solemanei.