Bag-ong Dekada

Unang adlaw karon sa pagsuong nato sa bag-ong dekada 2020 nga puno sa paglaum alang sa positibong pangindahay nga mahatagan og katumanan.

Mahitabo lang kini kun suongon pud nato ang mga hagit nga posible natong masugatan.

Magamit nato nga molampos sa atong tinguha ang mga kasinatian nga atong nakat-onan sa nakalabayng katuigan.

Lingion usa nato kadyot ang nahitabo sa tuig 2019 diin sa kataposang hunat mao ang nasinatian nato nga bagyong Ursula.

Grabeng naapektohan ang amihanang bahin sa lalawigan sa Sugbo nga gikuso kuso sa katalagman.

Kagahapong adlawa akong gibisita ang mga dapit didto sa Norte diin inanay nang nakabangon ang mga tawo.

Kasagaran sa grabeng naapektohan ang mga coastal areas ug ang mga isla nga gilampurnas ni Ursula.

Bisan pa man sa nasinatian nila apan nakadayeg ako sa ilang gipakita nga kalig-on nga nang repair sa mga pinoy-anan nga nagusbat.

Matud sa usa ka molupyo naanad na sila kay kanunay na sila mahiagum sa mga bagyo diin ang kinakusgan ang Yolanda.

Apan dili angayan kompyansahan ang ilang experience kay dili nato matimbang ang gahum sa kinaiyahan.

Unta dili sila sobrang magkampanti kay ang ingon niini nga kinaiya ang sagad madisgrasya.

Labtikan sad nako ang sitwasyon sa usa ka sitio sa barangay Poblacion Daanbantayan nga nahimong “waterworld.”

Daan nang wala mohubas ang baha apan nasamotan sa bagyong Ursula nga kalbaryo sa mga molupyo.

Ang means of transportation nila mao ang gakit nga bani sa saging aron sila makasulod ug gawas sa ilang pinoy-anan.

Unta mahatagan kini og pagtagad sa kagamhanan aron positibo kaayo ang bag og dekada sa mga hingtungdang molupyo.

Happy New Year!