English ibalik

Agi’g tubag sa nahimong resulta sa pasulit nga gipahigayon ubos sa Programme for International Student Assessment (PISA) niadtong miaging tuig diin ang mga tinun-an sa Pilipinas kulilat sa reading comprehension, Mathematics, ug Science, nahukman sa mga sakop sa Provincial School Board sa Sugbo nga wagtangon ang “mother tongue” isip medium of instruction ug ibalik ang “English.”

Ang maong lakang gipasiugdahan ni Liloan Mayor Christina Frasco kinsa maoy pangulo sa Liga sa mga mayor sa kalungsoran dinhi sa Sugbo. Nakaangkon og suporta ang maong lakang gikan sa iyang inahan nga si Gobernador Gwendolyn Garcia ug sa tanang sakop sa Provincial School Board.

Nunot sa resolution sa PSB, gipaabot nga ipatuman sugod sunod school year sa tanang tunghaan ubos sa probinsiya sa Sugbo ang paggamit sa English isip medium of instruction. Husto ang direksyon nga gisubay sa lalawigan. Angayang ibalik ang English isip medium of instruction sa mga tunghaan gikan sa Pre-School aron makaapas ang atong mga tinun-an sa international standards. Ang ka larino sa mga Pilipino sa English maoy usa sa nagpabilin natong bintaha sa atong mga silingan nga nasud sa Asya.

Kun dili nato ampingan ang maong bintaha, nabalaka ko nga moabot ang panahon nga mahanaw kini ug manglayas dinhi sa nasud ang mga call centers nga usa sa dako og natampo sa atong ekonomiya.

Nabalaka hinuon ko nga dili mahimong pugson sa PSB ang Department of Education pagpatuman sa ilang resolution. Kini tungod kay ang pagpatuman sa “mother tongue” isip medium of instruction nalatid sa balaud.

Ubos sa Republic Act 10533 o Enhanced Basic Education Act of 2013 kinahanglang mother tongue maoy gamiton pagtudlo sa mga estudyante gikan sa kindergarten hangtud sa Grade 3 samtang adto na sa Grade 4 hangtud sa Grade 6 magsugod ang English. Hangtud nga dili maamendahan ang maong balaud, dili mapugos ang DepED pagsunod sa resolution sa school board. Hinaut nga ang mga sugboanong kongresista molihok ug suportahan ang maong lakang.

Gikinahanglan sa gobernador ang suporta sa atong mga kongresista aron iduso ang pag-usab sa maong balaud nga napasar panahon ni kanhi presidente Noynoy Aquino.