Pagkasubli sa kasaysayan
Ang pagpangilog sa pribadong mga negosyo aron isabod ngadto sa labing suod nga mga hinanib sa mga nagtungkawo sa gahom gihimo na kaniadto. Si kanhi Presidente Ferdinand Marcos, atol sa kinapungkayan sa iyang diktadura pinasikad sa balaod militar, nagpatuyang lang og panguha sa mga kompaniya sa mga negosyante nga wa motila sa iyang pamunoan.
Ug nagpiyesta ang mga naglibot niya pagbahin-bahin sa abundang mga grasya.
Gipasanginlan ang pamunoan ni Presidente Rodrigo Duterte nga nagsugod na karon og kopya sa iyang gibalikbalik og pasidungog nga labing bantogan nga presidente ining nasura.
* * *
Way nangahas pagbalibad bisan unsay gitinguha ni Marcos ug sa iyang mga sinaligan. Gigawongan niya ang Korte Suprema. Gikandadohan niya ang Kongreso. Hinigtan niya sa ilong ang lokal nga mga opisyal.
Ug nalisang sa kabangis sa iyang kasundalohan ug kakostablehan ang kinabag-an sa katawhan.
Ang pipila sa mga nangahas sa pagsukol iyang gipasanginlan nga mga walhon ug mga subersibo. Mga kakonsabo sa mga komunista. Gawas sa mga tagtungod, way naglangas dihang gitamnan og mga ebidensiya, gibutang-butangan og mga kaso, gidakop, gidagit, gitanggong, gipangulata, gipanglugos ug gipamatay ang kasagaran nila.
* * *
Unang gitulisok ni Duterte nga adunahan nga iyang gub-on sa pagbanos sa Malakanyang si Jaime Ongpin. Nga wa motukol.
Niboluntaryo dayon sa pagtahan sa iyang online nga pasugalan nga giinitan pag-ayo sa presidente.
Karon wa na tandoga ni Duterte si Ongpin nga nagpabilin nga usa sa labing adunahang negosyante sa nasud. Ug ang bag-ong tag-iya sa pasugalan ni Ongpin mao na ang umagad ni anhing Presidente Marcos nga si Greggy Araneta.
* * *
Sa hulga ni Duterte pagtugyan sa negosyo sa pagapud-apod sa tubig sa Metro Manila gikan sa Manila Water ug Maynilad, pulos nagpa-upuy-upoy ang naapiking mga negosyante: Nagsige lang og duko ug paawot ang mga Ayala bisan sa tanang insulto ug pamalikas sa presidente; ang grupo rang Manny Pangilinan ang nihimo og taphaw nga sumbalik pinaagi sa pasumbingay nga mahimong mabangkarota sila ug problema na sa gobyerno nga way katakos sa pagbanos sa pag-suplay og tubig sa minilyon ka kabalayan sa kaulohan.
Naabtan og 14 ka tuig ang diktadura ni Marcos kay gipatuyangan ang tanan niyang pangabuso. Mangiyugpos ba lang tang magtan-aw nga masubli ang kasaysayan?
* * *
- Latest
