Pamolitika sa negosyo sa tubig
Ang gidudahang maniobra pag-ilog sa negosyo sa tubig sa Metro Manila gikan sa labing dagkong negosyante ngadto sa labing suod nga mga higala ni Presidente Rodrigo Duterte dako og implikasyon sa nagpadayong krisis sa tubig sa Metro Cebu.
Samtang gipasagdan sa Malakanyang ang mas grabeng pagrasyon og tubig sa kabalayan nga mga konsumidor sa Metro Cebu Water District (MCWD), kay kanihit sa tubig ra man sa Metro Manila ang nakapatay-og nila, ang mga negosyanteng pinangga sa presidente hagbay rang nagpanilap sa pagbanos sa dakong negosyo sa tubig dinhi sa ato.
* * *
Ang gikataho nga labing interesado nga mopuli sa MCWD mao ang PrimeWater Infrastructure Corp. nga gipanag-iya sa mga Villar nga maoy gihisgutan sa presidente nga iyang papulihon sa duha ka higanteng kompaniya nga nagbahin sa pag-suplay og tubig sa minilyon ka kabalayan sa Metro Manila, ang Manila Water nga gipanag-iya sa mga Ayala ug ang Maynilad nga gipanag-iya sa grupo ni Manny Pangilinan.
Kun uban sa tabang sa presidente molampos ang mga Villar sa pag-ilog sa mga negosyo nilang Pangilinan ug sa mga Ayala, mas sayon ang pagsakmit sa MCWD.
* * *
Apan di ang mga Villar ray naibog sa MCWD. Gidungog nga interesado sab ang laing suod sa presidente nga si Dennis Uy nga nisud na sa negosyo sa tubig pinaagi sa H2O Ventures Corp.
Laing nagplano nga mag-negosyo og tubig sa Sugbo mao ang Filinvest Hitachi Omni Waterworks (Flow) nga gikatahong niduol na sa lokal nga mga politiko aron paghimong mas sayon sa pagpalapad sa ilang operasyon sa Sugbo ug kasilinganang mga lalawigan.
* * *
Nadani sa negosyo sa tubig ang mga Villar ug ubang mga alyado ni Presidente Duterte tungod sa nagbaha nga kuwarta gikan sa mga konsumidor nga nagkinahanglan og tubig matag adlaw ug gabii sa ilang kabalayan.
Samtang gipasanginlan ang Manila Water ug Maynilad nga nipaburot sa bayranan sa mga konsumidor og gikan sa 596% ngadto sa 970% sukad sa ilang pagbanos sa pagapud-apod sa Metro Manila, ang PrimeWater nga mao na karoy nagkontrolar sa 63 ka local water districts sa nagkalainlaing bahin sa nasud gitumbok sab nga nipasaka dayon sa bayranan sa way pagpalambo sa suplay ug kalidad sa tubig.
* * *
- Latest
