Raket sa night market

Gipasusi na ni Cebu City Mayor Edgardo Labella ang report nga gipamaligya sa kantidad nga P5,000 ngadto sa P20,000 ang pwesto diha sa night market sa dakbayan.

Ang mitumaw nga kasayuran mao nga dunay mga opisyal ug kawani sa City Hall nga nagpaluyo niini. Apan lahi ang impormasyon nga gibutyag ni market administrator Jonil Matuguina ngadto sa media. Gikumpirmar hinuon ni Matuguina nga nakadawat sab siya niining maong kasayuran ug basi sa iyang pakisusi mga vendors mismo ang namaligya sa ilang pwesto.

Matud niya nga dunay usa ilang nahibaw-an nga tag-iya og pwesto apan gipaabangan ni og lain samtang siya nagbutang lang og gamay nga lantay. Kun tinuod ang iyang pangangkon, unsa may gibuhat sa dakbayan pagbadlong niini?

Gibawi ba sa market administrator ang pwesto ug gihatag ngadto sa lain nga buot maninda? Kun way gihimo ang dakbayan pagbadlong niini, dili kaha posible nga dunay mga kakunsabo nga opisyal ug kawani sa City Hall niini?

Di imposible nga ang pobre nga mga tindiro ug tindira gigamit lang nga dummy sa mga kurakot nga kawani sa City Hall aron pagdismolar sa ilang pangwarta. Ang hinungdan nganong giablihan ang night market diha sa Colon mao nga kahatagan og luna ang mga naapektuhan sa road clearing operation.

Buot sa kagamhanan sa dakbayan nga makapanginabuhi ang mga nawad-an sa ilang pangita tungod sa paglimpiyo sa sidewalk. Apan basi sa akong personal nga pagpakighinabi sa pipila ka mga tindiro sa night market, dili tanan nila apektado sa road clearing.

Usa sa akong nahinabi miingon nga duna silay permanente nga karenderia diha sa pantalan matag-adlaw ug panahon sa kagabhion mobalhin sila og paninda sa night market. Wala na siya makahatag og detalye giunsa nila pagkabaton og pwesto sa night market tungod kay igo ra sab siyang gisuholan.

Kun ingon niini ang sitwasyon diha sa Night Market dako gyud ang posibilidad nga dili mga sidewalk vendor ang nagpahimulos kun dili kadtong mga negosyante nga makabayad og mahal sa pwesto. Busa hagit ni sa kaligdong ni Mayor Labella.

Ug kun tinuod man nga mga vendors ra gyud ang nagpahimulos, tingali panahon na nga i-review sa dakbayan ang maong programa. Mas maayo tingali nga hunongon ang night market kun ipamaligya man lang sa mga vendors ang ilang pwesto.