Napunit nga balaodnon

Ang kontrobersyal nga ordinansa nga buot ipalabang sa usa ka konsehal sa Talisay City nga magmando unta sa mga motorista sa pagdala og “chalk” giingon nga gibakwi lang una sa konsehal. Daghan ang misaway sa maong balaodnon.  Magtuon pa diay ug dugang ang awtor sa balaodnon aron kuno masabtan pag-ayo sa publiko ang iyang tumong.  Sama ra ang awtor nga naglung-ag og kan-on nga wala pa kilisi.  Ang napadulngan hinoon mao nga wala pa gani mahingpit pagpanamkon sa sabakan sa Konseho, napunit na ang puya nga balaodnon.  Study pa more!

Addition vs. subtraction

Mipahimangno si Konsehal Jun Gabuya sa administrasyon sa dakbayan sa Sugbo nga, nunot sa pagpanghatag sa incentive bonus sa mga kawani sa kagamhanan sa dakbayan, angayan usab unta nga atimanon ang mga kawani sa barangay, diin ang uban kanila, wala pa gani makadawat sa ilang suholan.  Giingon man hinoon sa Bibliya, “Kinsa kadtong adunay iya, pagahatagan ug labaw pa, apan kadtong walay iya, pagakuhaan sa bisan unsa nga anaa kaniya”.  Matud pa sa akong kumpare, “MADAHAAAN!!!”

Pasalig dalang hambog

Nangandak ang nagbuhat karon sa Cebu-Cordova Link Expressway (CCLEX) nga nailhan pag-ayo nga third Mactan-Cebu Bridge nga makasugakod ang maong tulay bisan sa 7.8 magnitude nga linog ingon man sa mga mapintas nga bagyo nga may gikusgon nga 250 kms matag oras. Makalipay ang maong pamahayag apan dili angay nga ipasi-atab.  Mahimo  nato’ng kutloan og leksyon ang susamang pasi-atab gikan ni Capt. Edward Smith, kapitan sa barko nga Titanic, kinsa miingon, “Bisan ang Diyos mismo, dili makapaunlod niining maong barko”.  Matod pa sa awtor nga si Steven Biel, “Dili mo mahimong limbongan o ilaron ang Diyos sa maong paagi.”  Tikal pa more!

May’gani naay rite med

Adunay gipahigayon nga imbestigasyon ang Department of Health batok sa mga ospital nga gireklamo sa ilang kalapasan sa Republic Act 10932 o “Anti-Hospital Deposit Law”, tungod sa padayon gihapon nga pagpaningil ug deposit sa mga pasyente nga anaa sa emergency nga kahimtang.  Daghan na ang gikataho nga imbestigasyon mahitungod sa maong kalapasan apan walay maayong gisangputan.  Mora man hinuon nga inay matabangan ang pasyente, ang epekto sa maong balaod daw nagdili na hinuon sa tawo nga masakit kon walay kwarta.  Mao na’y giingon, “Kon kabus ka, bawal magkasakit.”  Maayo na lang gani kay naay “Rite-Med”. Hala no!