Pangandam ug pagtabang
Ang pagkaluwas sa amihang Sugbo gikan sa labing bangis nga santako sa bagyong Tisoy di angayng makapahiyos sa mas lapad nga pangandam sa lokal nga mga opisyal ug mga molupyo sa nagsingabot nga katalagman.
Tungod tingali sa mga pagtulon-an sa bagyong Yolanda unom ka tuig ang nilabay, o sa mga pasidaan sa Department of Interior and Local Government (DILG) nga ikiha sila kun di igkita inig abot sa bagyo, mas aktibo ang mga mayor nga nangu sa ilang mga lungsod ug dakbayan pag-atubang sa hulga sa mga kinabuhi ug kabtangan.
* * *
Maayong timaan ang pagpabakwet nang daan sa mga molupyo sa kabaybayonan sa Daanbantayan, nga apil sa gitugpahan ug labing nagusbat ni Yolanda niadtong 2013, ngadto sa mas luwas nga mga dapit pila ka takna sa wa pa moagi si Tisoy.
Mas maayong timaan ang pagsugot sa mga molupyo sa pagbiya sa ilang mga pinuy-anan. Sa way paglalis nga layo pa ang bagyo ug sa ka way seguro moigo ba gyod nila.
Wa na sab kinahanglanang gamitan pa og puwersa aron pagsakripisyo nga mobakwit ang tibuok pamilya apil nang gagmayng mga bata.
* * *
Maayong panig-ingnan ang gihimo sa lokal nga mga opisyal sa San Remegio ug Danao City—gitanyagan og pagkaon ug mas luwas nga kapahimutangan ang natanggong nga mga pasahero inay pasagdan nga magpabilin nga mangabasa sa mga pantalan paingon sa mga isla ssa Bantayan ug Camotes.
Hinaot nga sundon sa mga dakbayan sa Sugbo ug Mandaue ug ubang mga dapit nga may mga pantalan ug mga pasahero nga matanggong sab kun gakotan nang mga barko.
* * *
Samtang nasentro ang pagtagad sa labing dagkong mga opisyal sa gobiyerno sa kadaot sa pagkusukuso ni Tisoy sa Luzon, kay maoy gipahigayonan sa 30th Southeast Asian (SEA) Games, ug pasalamat nga nakalikay ta sa labing kusog nga bagyo karong tuiga, angay tang motunol sa labing daling panahon og hinabang ngadto sa makaluluoy nga mga biktima sa Northern Samar ug silangang Kabisay-an.
Nga atong nahimo sa nangaging mga katalagman sa baha sa Ormoc sa 1991, pagdahili sa yuta sa Guinsaugon sa 2006 ug bagyong Sendong ug linog sa Mindanao sa 2011 ug 2019. Hinaot nga di pakyason ang atong mga silingan karon.
* * *
- Latest
