City Hall drug users

Miabot na og 41 ka kawani sa Cebu City government  ang napositibo sa nagpadayong drug test nga gipahigayon sa City Office for Substance Abuse Prevention (COSAP).

Suportahan nako ang baruganan ni Mayor Edgar Labella nga angay gyud nga pangtaktakon sa serbisyo kining maong mga empliyado ug dili maayo nga sila ipabilin sa ilang pagtrabaho sa City Hall.

Para kanako, kon motrabaho ka sa kagamhanan, kinahanglang ehemplo ka sa publiko. Apan ehemplo ba gud nga sila mga drug users? Dili ko mosakay sa baruganan ni Vice Mayor Mike Rama nga hatagan og laing higayon ang maong mga kawani.

Bisan og ang maong mga kawani nakatabang pa’g dako sa kampanya nila ni Mayor Labella ug Vice Mayor Rama, dili kini gamiton nga rason aron nga sila dili taktakon sa trabaho kay nagpakauwaw lang sila.

* * * 

Gahi gyud og ulo kining kontraktor sa usa ka condominium project sa unahan nga bahin sa Marco Polo Plaza Hotel.

Ang mga cement mixer ug mga cargo truck nga maghakot og semento alang sa ilang proyekto, walay hugas ang ligid ug magdala’g semento nga mamilit iniggawas.

Ang mga semento mangatagak ngadto sa karsada ug makamugna og abog, gawas pa ang karsada nahimo na nga “rough road” ug kuyaw na kaayo sa mga magsakay og motorsiklo.

Tambag nako sa mga tinugyanan sa CITOM ug PNP Traffic Group nga himoi ninyo kini og lakang. Pangdakpa ninyo ang mga driver niining maong mga sakyanan, isyuhi gyud og TOP.

Nagreklamo intawon ang mga nagpuyo daplin sa karsada kay ang abog tungod sa semento nga mangatagak sa karsada, masimhot nila og kuyaw kaayo ni.

Gani, may nahinabi ko nga usa ka senior citizen sa maong lugar, misugilon nga gihubak na tawon siya. Hangyoon nako si CITOM Executive Director Ricardo Barandog nga iya ning aksiyonan.

Mas maayo nga postingan og traffic enforcer ang maong dapit sir aron dili pagawason ang mga sakyanan nga walay hugas ug ang mga semento ug anapog namilit sa ligid.

* * * 

Ang gusto ni Mayor Edgar Labella nga molingkod pagka hepe sa kapolisan sa dakbayan sa Sugbo mao si Koronel Arnel Banzon.

Nagpadala na si Labella og suwat kang Brig. General Valeriano De Leon.

Apan human nga migawas sa media ang maong balita, giparelibohan man ni De Leon si Banzon gikan sa iyang pagka operations chief sa Police Regional Office-7.

Sa akong bahin, maghuwat ra ko kay basin og gi-relieve si Banzon kay ibalhin na sa CCPO. Pero kon ilabay siya og laing rehiyon, lain na kana nga isyu.