Labella gusto ni Banzon

Uy, may girekomendar na man diay si Mayor Edgardo Labella nga opisyal sa kapolisan nga ibutang pagka direktor sa Cebu City Police Office, apan wala dayon kini itudlo sa pwesto ni PRO-7 Regional Director Valeriano de Leon.

Para nako, haum kaayo sa pwesto si Koronel Arnel Banzon kay usa siya ka Sugboanon ug walay buling ang kadungganan. Wala malambigit og bisan unsa nga kurapsiyon, ug bisan unsa nga kaso.

Wala usab madungog si Banzon nakiglambigit og mga politiko. Nakadayeg ko niining Banzon kay gawas nga hilomon nga pagkatawo, matinud-anon sa iyang trabaho.

Anak siya sa akong amigo nga si Koronel Pepito Banzon, nga naghupot og daghang mga tag-as nga katungdanan sa kapolisan dinhi sa rehiyon sa wala pa siya moretiro.

Kini si Arnel maoy hepe kaniadto sa PNP-SWAT sa Dakbayan sa Sugbo ug moapil gyud siya pagresponde sa mga alarma, dili kay manugo lang.

Angayan kaayo siya palingkoron isip hepe sa kapolisan dinhi sa dakbayan, ilabi na nga nagsingabot ang dakong kalihokan sa kapistahan ni Señor Santo Niño karong Enero.

Kay Cebuano man si Banzon, siguradong maningkamot gyud siya nga magmalinawon ang siyudad sa Sugbo kon siya na ang makalingkod nga hepe sa kapolisan.

Si Koronel Geovanie Mainis man gud, nga karon maoy gipalingkod nga Officer-in-Charge (OIC) sa kapolisan dinhi sa siyudad, dili kaayo maka-focus sa iyang pagdumala sa CCPO kay siya man usab ang deputy regional director for operations.

Saludo ko ni Mayor Edgar Labella nga nakahunahuna nga si Koronel Banzon maoy iyang himoong hepe sa kapolisan dinhi sa dakbayan.

Angay nga tumanan ni General De Leon si Mayor Labella sa iyang tinguha nga si Banzon maoy ibutang nga hepe sa CCPO kay ubos sa balaod (Republic Act 8551), ang mayor maoy gihatagan og gahum nga mopili kon kinsa ang opisyal sa kapolisan nga modumala sa PNP Force sa iyang lugar.

Usa kini sa gahum nga gihatag sa mga mayor kay sila giisip nga deputy sa National Police Commission (Napolcom.

* * *

Naisyu ug naproblema tawon ang upat ka sakop sa PROBE Team nga igo lang mituman sa sugo kanila sa ilang labaw. Daghan man gud ang nalooy nga ang usa ka sidewalk vendor gisakmitan sa PROBE sa iyang baligya.

Unsaon man sab gud nga badlongon man kaayo ang maong vendor.

Matud ni Raquel Arce, hepe sa PROBE, nadakpan na nila ang maong vendor kaupat ka higayon ug igo ra nila nga gi-seminar nga dili gyud patindahan ang aseras.

Apan miinsister gyud ang maong vendor ug mao nga gisakmit ang iyang baligya.