Leksiyon sa mga tikasan

Dunay panultihon nga nagkanayon: “Kadaghan ka mahigam, apan kausa ra g’yud ka motagam.”

Mao ni ang nahitabo sa upat ka mga tindahan og lechon diha sa dakbayan sa Carcar human hingpit silang gipasirad-an ni Mayor Merceditas Apura niadtong Biyernes tungod sa daghang mga reklamo ug kalapasan.

Ang mayor miluwat og Executive Order No. 55 nga nagpasira sa mga mosunod nga mga tindahan og lechon—Mercy Roels, Honeylette Navaja’s, Arlene Manreal’s, and Loreta Camanero’s.

Nasuta sa pakisusi sa kagamhanan sa dakbayan sa Carcar nga ang nahisgutang mga tindahan way mayor’s permit ug sanitary permit. Sentro sab sila sa daghang reklamo sa mga customers tungod sa katikasan.

Ilang modus ang pagpamugos sa ilang baligya ngadto sa mga customer, kuwang sa timbang, ug pag-ilis sa imong pinalit og bahaw nga lechon. Daghan na ang nahimo nilang biktima. Ang kasagaran miutong kay di gusto og samok ug ang uban hadlok moreklamo kay barumbado ug maldito ang mga tag-iya sa tindahan.

Salamat sa social media nga maoy nahimong taytayan pagpukaw sa lokal nga kagamhanan aron mohimo og aksiyon sa dugay na nga pagpahimulos sa mga barumbado ug abusadong tindiro ug tindira og lechon diha sa Carcar.

Hinaut nga ang nahitabo magsilbing leksiyon sa ubang mga negosyante og lechon nga ampingan ang imahe sa ilang patigayon ug labaw sa tanan ang dungog sa ilang dapit. Sa ilang pagpanikas, ilang gipatay ang kaugalingon nilang industriya.

Angayang isilsil sa mga negosyante og lechon diha sa Carcar nga sila maisip nga mga ambassador sa ilang dapit. Kun inyong tikasan ang mga customer, labi pa kadtong mga dayo nga moagi lang sa inyong dapit, inyong giguba ang dungog sa inyong syudad.

Siguradong sa matag-customer nga inyong mabiktima bugti niini ang pagkahanaw sa daghan pa untang posibling madani sa pagpalit sa inyong produkto. Alang sa lokal nga kagamhanan, angayan nga itudlo ug kanunay’ng ipahinumdom ngadto sa mga tag-iya og patigayon ug bisan sa ordinaryong lumolupyo sa inyong dapit nga sila dunay dakong tahas pagtabang sa pag-promote sa inyong syudad.

Responsibilidad sa matag-lumolupyo nga ipasigarbo ang mga maayong hiyas ug kinaiya sa kumunidad nga iyang gipuy-an. Apan unsa may ikapasigarbo sa mga molupyo sa Carcar kun ang mga tindiro ug tindira sa nabantog unta nga lamian nilang lechon gipasanginlang tikasan?