Unsaon pagbaraw si Robredo
Bisan gisumbalik ni Bise Presidente Leni Robredo ang mga panagana sa mga opisyal sa pamunoan ni Presidente Rodrigo Duterte unsa siya kaandam sa pagduma sa kampanya batok sa ilegal nga drugas pinaagi sa pasumbingay nga pasidaan kun andam ba sila niya, wa gyud tingali nagpaabot nga ingon ini siya ka-agresibo sa pagsugod dayon pagtuman sa bag-o niyang katungdanan.
Sud lang sa usa ug tunga ka adlaw human siya natudlo, nabasa nang Robredo ang mga dokumento, nahinabi nang mga opisyal ug napatawag dayong tigom sa Inter-Agency Committee on Anti-Illegal Drugs (ICAD).
* * *
Gihimo ning tanan ni Robredo bisan wa pa matakda ang tigom nilang Duterte.
Sa ato pa, wa pa sila magkasabot unsa gyud ang iyang katungdanan ug unsa kahingpit ang iyang gahom isip labawng tigpatuman sa kampanya batok sa ilegal nga drugas.
Wa magpaabot si Robredo og dugang katin-awan sa presidente. Igo na para niya ang pahibawo sa Malakanyang nga siyay drug czar o czarina sa nahibiling kapin sa duha ka tuig sa termino ni Duterte. Kay nihit man og detalye ang tanyag, gipalabi ni Robredo ang paglihok kay sa pagpananghid.
* * *
Kinsa man tuod ang mangahas sa pagbaraw sa iyang pagdalidali?
Kinsa man ang makalalis sa kadinalian sa pagsulbad sa problema sa drugas? Gitudlo na siya ug busa nganong pugngan man sa paghangop sa bag-ong gimbuhaton?
Gitapakan ni Robredo ang haw-ang sa iyang pagkatudlo pinaagi sa pagsabot nga human niangkon ang presidente nga napakyas ang kampanya sa niaging kapin sa tulo ka tuig bukas si Duterte sa kausaban nga gipanghinaot nga mas epektibo batok sa drugas.
* * *
Mahimong nanaguto na karon ang presidente sa pasiunang mga lakang ni Robredo. Mahimong nakumbinser na nga gipahimuslan ni Robredo ang gisangon niyang katungdanan aron pagsangyaw sa iyang sukwahi nga mga panglantaw sa kampanya batok sa ilegal nga drugas.
Mahimong mapugos ang presidente pagbuak sa iyang kahilom kun hinayunon ni Robredo ang uban niyang mga plano: Gidaghanon sa nangaluwas ug di sa nangamatay ang bag-ong sukdanan sa kalamposan; palingkuron sa ICAD ang human rights ug religious groups; ug hangpon ang presensiya sa mga tigpaniid o mga imbestigador sa United Nations (UN) o bisan sa International Criminal Court (ICC).
* * *
- Latest
