EDITORYAL - LGUs maoy sad-an

Seryuso na ang gobiyerno nga mabawi ang mga dalan gikan sa mga pribadong tawo nga migamit niini nga daw sila maoy tagiya para sa ilang mga negosyo, apan pipila ka mga mayor ang uwahi tingali sa balita o wala lang manumbaling sa direktiba.

Ang kalihim sa Department of the Interior and Local Government (DILG) nga si Eduardo Año mibutyag nga 97 ka mga mayor sa mga siyudad ug mga lungsod ang gipaesplikar kun nganong wala sila makatuman sa mando nga mag-clearing sa ilang mga kadalanan.

Dinhi sa Sugbo, adunay pito ka mga mayor ang gimandoan sa pagesplikar sud sa lima ka adlaw kay kun dili ihatag ilang mga pangalan ngadto kang Pres. Duterte ug hayan makasuhan ug masuspenso tungod sa wala nila pagtuman sa DILG Memorandum 2019-121.  Sila mao ang Carcar City, Badian, Carmen, Compostela, Ginatilan, Moalboal, ug Pinamungajan. Samtang ang Antequera, Garcia Hernandez, Talibon, ug Valencia sa Bohol ug ang Larena sa Siquijor wa sab makatuman sa mando.

Kun tanawon itandi ang mga kadalanan sa miaging tuig sa karon hawan na ug hamugaway na kay kaniadto wala atimana sa mga local officials sud na sa dugay nga panahon. Angkunon man o dili, ang mga street vendors ug kaning mga illegal nga estrakturang gitukod nga extensions sa mga establisamento nakatampo gyud sa problema sa traffic.

Pagkakaron 6,800 ka mga public roads sa tibuok nasud na ang nabawi sa gobiyerno gikan sa mga abusadong nag-okupar niini para sa kaugalingong interes. Ang mga LGUs kulang og political will, kun dili pa tungod sa direktiba sa nasudnong kagamhanan, dili gyud sila molihok.

Hinuon, bisan pa man og gipapahawa ang mga vendors apil sa kinahanglang tumanon sa mga LGUs  diha sa maong DILG-Memorandum 2019-121 nga kinahanglang duna silay buhaton aron matabangan ang mga vendors nga di makulban og kaldero.

Sunod nga sangunan sa maong tahas mao ang mga barangay officials kay usa sila sa hinungdan nga nigara kining mga nag-ali diha sa mga dalan.