Ninja cops

Giimbistigar karon sa Senado ang kasayoran nga gibulgar ni Baguio City Mayor Benjamin Magalong nga naglambigit sa pinakataas nga opisyal sa Philippine National Police, Heneral Oscar Albayalde mahitungod sa mga police nga nag-recycle sa drugas nga ilang nakonpiskar sa ilang mga dinakpan sa operasyon.

Una nang gibulgar ni Director General Aaron Aquino sa Philippine Drug Enforcement Agency (PDEA) nga police ang tinubdan sa drugas nga gibaligya sa giilang drug queen sa Metro Manila.

Giangkon usab ni Heneral Debold Sinas nga adunay mga ninja cops dinhi sa Central Visayas apan wala pa ninya kini panghinganli.

Ang isyu sa ninja cops nagbutang sa peligro sa kapalaran ni Heneral Albayalde sa iyang pagpabilin sa katungdanan. Gikatakda na siyang moretiro sa iyang pagka polis karong sunod buwan.

Basin og madala ra og dupa ni Senador Bato Dela Rosa si Albayalde ngadto kang Presidente Rodrigo Duterte.

Kun wala pa mo malimot, si Senador Bato Dela Rosa ang nag rekomendar kang Albayalde ngadto kang Presidente Duterte nga maoy mosunod kaniya sa pagka hepe sa kapolisan lukop nasud.

Bisan asa nga organisasyon anaa g’yoy mga badlungon maong makasabot ra pod ta. Bisan gani ang organisasyon sa atong Ginoo nga gilangkoban lang og 12 ka disipolo may usa man nga nagpabadlong ug dili pod basta-basta ang iyang gihimo kay iya man nga gibaligya ang iyang pangulo.

Ang problema lang kun ang nagpabadlong mao mismo ang pangulo. Dako gayod kini nga peligro. Hinuon gipanghimakak ni Heneral Oscar Albayalde ang mga pasangil nga gibato kaniya. Manghinaut lang ta nga nagsulti ang heneral sa tinuod.

Sa laing bahin, basi sa atong nakita, nadungog ug nabasa nga mga balita makaingon lang ta nga dili diay sulbad sa pagwagtang sa mga badlungon sa organisasyon sa kapolisan ang pagduble sa ilang suweldo.