Presensiya ug atensiyon

Kaniadtong medyo bata pa ko adik kaayo ko sa bisan unang computer game kaniadto. Wala pa nuon ang internet niadtong panahon namo mao nga kutob sa mario, mortal combat, double dragon, battle city, tetris. Mao kining mga dulaa among lingaw bahala na kun tingog nilang mama mapagaw.

Sa akong bahin nahimong daw nahatag gyud nako ang atensyon ingon man presensiya niadtong mga dulaa kaniadto pa. Apan sa paglabay sa  panahon, nakita ko nga dunay mas mahinungdanon pa kaysa mga duwa diha sa birtwal nga kalibutan. Ug kini ang presensiya ug atensiyon sa tinuod nga kalambigitan. Kun maghisgot kita og presensiya anaa ang imong pisikal nga bayhon sa mas reyal ug pisikal nga aspeto. Mahimo kang hikapon, ikahinabi. Sa imong bahin gihatag nimo ang tanan nga naa nimo nianang higayona. Ug ang tawo nga gikakuyog nimo ang mahimong makasinati usab niini.

Butang nga ilang ikalipay sa hilabihan. Ang atensiyon sa laing bahin maoy imong gimbut-an nga pagtahan kun unsay gikinahanglan sa maong higayon. Sama pananglit sa tawo nga nanihapon ug nidapit kanimo sa pagpangaon. Ang  pagtangka lang daan sa talad kan-anan usa naman ka dakong pagpakita nga bililhon ang higayon ug ang tawo nga nidapit kanimo sa moang higayon.

Usa kini ka dakong pagpadayag sa imong atensiyon ug pagpaambit sa imong presensiya ngadto kanila nga mahinangop gyud niini.