Aso peligro!

Kompirmado nga naabot sa nasod ilabi na sa Mindanao ug Visayas ang aso gikan sa nasunog nga kalasangan sa Indonesia o gitawag nga haze phenomenon nga nakamugna og kahadlok sa katawhan.

Ang Environ-mental Mana-gement Bureau-7 mipahimangno sa peligro nga mamugna niini sa panglawas sa katawhan sanglit ang hilabihan kuno ka pino ang haze particles nga mosulod sa atong lawas.

Busa mitambag ang EMB nga mogamit og mask nga dili ordinaryo kay kon kadtong tag kinsehon lng nga medical mask makalusot gihapon ang haze particles.

Ang mga namaligya og mask mipadayag nga nagkuwang na o wala nay available nga mask kay ang mga tawo murag nag panic buying.

Gitambag usab ang paglikay sa mga outdoor activities ug kon walay importanteng lakaw magpundo nalang sa sulod aa balay.

Lakip sa gi-discourage ang  pag-exercise sa gawas sama sa pag-jogging kay mas kusog nga masulod sa lawas ang haze.

Tataw kaayo hangtod karon nga naghabol gihapon sa kawanangan ang haze kay bisan init ang panahon apan puti gihapon ang langit inay blue ang kolor niini.

Apan matud sa Department of Health nga dili angayan mag-panic ang mga tawo sa haze phenomenon.

Tinuod nga peligro kini sa panglawas apan dili kinahanglan mag-over react niini kay mahimo ra kining masolusyonan kon managang lang sama sa pagtabon sa ilong.

Wala pa matino hangtod kanus-a mawagtang ang haze, magdepende seguro kon mapalong ang sunog sa kalasangan sa Indonesia.

Bitaw sobra kitang nag-react sa haze sa Indonesia apan dinhi mismo sa atoa namilegro na kita sa aso sa atong palibot.

Kini gikan sa mga sakyanan, pagpataka sa pagsunog og mga basura ug uban pang mga kalihokan nga naghugaw hugaw sa atong kahanginan.

Nahitabo lang nga dunay imported air pollutant ang nibisita sa nasod.

Pastilan no? Kong atong hunahunaon ang kahugaw sa hangin seguro adlaw adlaw usab kitang magsul-ob pangtabon sa ilong aron dili maapektohan.