Pag-angkon ni Duterte

Atol sa usa ka kalihokan didto sa Malakanyang niadtong Martes sa gabii giangkon ni Presidente Rodrigo Duterte nga siya maoy nagpaluyo sa pagbanhig kang kanhi Daanbantayan mayor Vicente Loot ug sa iyang pamilya niadtong Mayo sa miaging tuig didto sa pantalan sa Barangay Maya, Daanbantayan. Sa iyang pakigpulong atol sa pagpanumpa sa mga bag-o niyang tinudlo sa katungdanan, subling gibalikas ni Duterte si Loot nga una niyang gipasanginlan nga nalambigit sa negosyo sa drugas. Sa wala damha kalit niyang giangkon nga iyang gipa-ambush ang kanhi heneral sa kapolisan apan wa kini mamatay. Ug sama sa nangaging higayon nga naapiki ang presidente tungod sa pagpataka niini og yawit, nagkapuliki og panagang ang iyang tigpamaba nga si Secretary Salvador Panelo. Akoy naluoy sa kahimtang ni Panelo tungod kay bisan labihan ka klaro sa pag-angkon sa presidente, nangita gyud og paagi si Panelo unsaon paglusot sa bulilyaso.

Si Panelo miingon nga wala moangkon si Duterte og responsibilidad pagbanhig ni Loot ug sa iyang pamilya. Matud niya nga igo lang miingon ang presidente nga gi-ambush na si Loot apan wala mamatay.

Pastilan, naingon intawn siya og kenkoy sa paningkamot nga makontrolar ang danyos sa pamahayag sa presidente. Daghan ang naglagot sa gihimo ni Panelo apan angayang natong hinumduman nga igo lang siyang nagtuman sa iyang trabaho. Isip loyal nga sulogoon saludo ko sa ka sipsip ni Panelo sa iyang agalon bisan iyang kaugalingong pagkatawo ug kredibilidad gisakripisyo. Pero dili kaha maayo nga sa dili pa mangugat si Panelo og pangabogar sa presidente magsabot una silang duha og unsay ilang isulti sa publiko?

Lahi ang isulti ni Duterte, lahi pud ang iya ni Panelo. Kataw-anan nga si Duterte niangkon nga responsabli sa usa ka kremin apan ang iyang tigpamaba maoy mohimakak alang niya. Dili kaha maayo nga si Duterte mismo maoy mohimo niini?

Di angay mabalaka si Duterte kon iyang bakwi-on ang iyang pamahayag ug mangangkong kumedya ra ang iyang pag-angkon tungod kay naanad na ang publiko nga sa matagbulilyaso nga iyang mahimo modayon siya og palaban sa kumedya. Kining maong kinaiya sa publiko maoy naghatag ni Duterte sa kaisog nganong yano niyang angkunon ang paghimo og krimen, bisan ihimakak sa iyang tigpamaba, tungod kay kumpiyansa siya nga mayoriya sa mga Pilipino mopagakpak ug moaliluya niya.

Kun tinuod man ang iyang pag-angkon hinaut nahunahuna sa presidente nga dunay mga inosente nga kauban si Loot atol sa maong higayon. Swerte nga way nakalas apan nabutang sa peligro ang kinabuhi sa mga bata atol sa maong higayon.