Kun ugaling mosaka ang Standard of Living

Daghan nato ang naningkamot gyud taman sa ginhawa sanglit buot man nato nga mamahimong taas ang atong standard of living.

Tumong nato nga mamahimong secure diha sa atong umaabot nga panahon. Apan ang pangutana mao pananglit kun makab-ot nato ang standard of living unsa man pud kaha ang atong mahimong patas-an?  Mas labing maayo nga atong patas-an ang atong standard of giving labina gyud panahon sa kaadunahan.

Usahay man gud nakalimot kita nga diha diay sa pagkamanggihatagon mahimong makita nato ang tinuod nga kahulogan sa kinabuhi.

Kay mag-unsa m an diay ang kinabuhi labina kun ugaling luyo niini anaa ang kahakog. Mahimong mahisama kita sa Dagat nga Patay.

Nagpunay lang kita og hakot ug panghipos apan nahikalimot kita paghatag ug kun ugaling kita mohatag ang atong mahatag mao man ang mga butang nga wala na nato kinahanglana o salin ba kaha nuon gikan nato.

Ang tinuod nga manggihatagon tawo usab nga mahigugmaon. Kini tungod kay ang tinuod nga paghatag nagpasabot man sab og paghigugma.

Kun wa kay gugma unsaon man nimo paghatag sa imong giisip mong mahinungdanon ug bililhon gikan nimo labaw na kun ang imong hatagan dili importante alang nimo? Ang tawong manggihatagon tawo usab nga maampoon kay diha sa pagpakigtagbo sa Dios ang tuburan sa tanang kaayo nahimo man natong mahimamat diha sa pag-ampoi.

Siya nihatag kanato ug sa maong paghatag niya kita pud unta makakat-on. Dili kini mahitungod sa maayong balay o haruhay nga kinabuhi mahitungod usab kini sa nindot nga pakigsandurot sa mga tawo nga kabahin gyud sa atong kinabuhing tawhanon ug Kristohanon.  Mao kini ang kahulogan sa relihiyon. Dili lang kini building kondili relasyon.