Labella migilak
Usa ka tigpaniid mikompisal nako nga dinha kunoy higayon nga nagkalalis silang Mayor Edgar ‘Ed’ Labella ug Bise Mayor Michael ‘Mike’ Rama.
Matod pa niya, gustong Mike nga paphaon tanang job orders sa Cebu City Hall, kinsa mga kaalyado ug gipasulod og trabaho ni kanhi Mayor Tommy Osmeña panahon sa administrasiyon niini.
Mipalag si Ed. Gibaraw niya ang bating sugyot ni Mike nga ingon sa may nagpahiping kalayo sa pagdumot batok sa ila kanhing kaatbang sa politika. Nailhan ang bag-ong mayor sa iyang pagkamahigalaon, dili lang sa iyang mga dumadapig, kondili hasta sa iyang mga kaaway. Kitang tanan gitratar niya nga iyang mga higala.
Busa, gibuhian ni Ed ang usa ka patas nga desisyon pinaagi sa pag-ingon nga ang basehan niya sa pagpanangtang og mga job orders mao: ‘
Ang iya-iyang work performance ning mga nahisgotang kawani. Kadtong mga badlongon, pahunongon.
Samtang ang mga maayo, papadayonon.’
Pagkadalaygong buhat! Buhat nga daw nagpangamay og kahiusahan.
Ang alagaran sa mayor, dili lang kadtong miboto ug mipadaog niya sa eleksiyon kondili lakip na kadtong wala mibotar niya. Kitang tanan iyang silbihan.
Kining kinaiyaha anaa sa kasingkasing ni Ed. Gani, niining bag-o, diin nagplano ang City Hall nga hawanan ang kadalanan sa Carbon nga hagbay rang gilubgan sa mga ilegal nga nanindahay, siya misaad nga kinsa kadtong tindahan nga maapektohan, iyang paningkamotan nga may hustong dapit nga kabalhinan.
Kay nasayod siya, nga luoy pod ang mga gagmay ug pobreng tindera nga mawad-an sa ilang inadlawng kapanginabuhian.
Busa, dili angay ikahibulong, nga dihang mipahigayon og piniliay sa pagka national chairman ang League of Cities of the Philippines (LCP) atol sa ika-68th General Assembly ug Election of Board members, diin didto himoa sa Edsa Manila Shangri-La sa miaging Hulyo 19, si Mayor Edgar Labella ang migulang mananaog.
Sa kabag-o ni Ed nga milingkod isip mayor sa dakbayan sa Sugbo, siya nakurat nganong mao gyoy gipili nga usa ra man siya ka ordinariyong tawo nga nakigparang sa usa ka tadhang politiko sa miaging piniliay?
Ang kalinis sa pagpangalagad ni Ed sa katawhan nahisama sa dyenwen ug mahalong bato nga nakita sa mga kaubanan niyang mayor sa miaging LCP. Busa, siya migilak.
- Latest