Political strategy

Usa sa mga punto nga mitatak sa ika-upat nga State of the Nation Address ni Presidente Duterte niadtong Lunes mao ang iyang tinguha nga iuswag ang umaabot nga Barangay ug Sangguniang Kabataan elections karong Mayo 2020.

Kun madayon ang tinguha sa Presidente mao ni ikaduhang higayon nga iyang giuswag ang pagpahigayon sa Barangay ug SK elections. Niadtong 2016 gi-postpone sab niya ang maong election gikan sa Oktubre 31, 2016 ngadto sa Oktubre 23, 2017.

Ang iyang rason kaniadto mao nga daghan kuno sa mga naglingkod nga opisyal sa barangay ang nalambigit sa illegal nga drugas. Matud niya nga siguradong gamiton nila ang kwarta sa drugas aron masublian sa ilang pwesto.

Tinguha niya niadto nga limpiyohon una ang problema sa drugas sa dili pa mohimo og piniliay.

Apan hangtud ron nagpabilin ang problema sa drugas diha sa kabarangayan. Hangtud wala gyud malimpiyo sa Presidente ang tibuok nasud gikan sa maong problema. Ang konswelo hinuon sa katawhan mao nga way say hunong ang kapolisan paglutos sa mga durugista.

Niining bag-ong tinguha sa Presidente nga i-postpone ang election, lahi na sab ang iyang rason. Matud niya nga kini aron kuno makurihian ang wala na magkadimao nga gidugayon sa mga termino sa opisyal sa barangay.

Ubos man gud sa balaud tulo unta ka tuig ang ilang termino. Apan tungod sa pagpostpone sa election niadtong 2016 nahimo nalang duha ka tuig tungod kay kinahanglan naman pud nga mag-election sa sunod tuig.

Mao nga matud niya angayang iuswag na sab ang eleksiyon. Dunay duha ka mga balaudnon ron nga nag-ong-ong didto sa Kongreso. Usa niini nagsugyot nga sa Oktubre 2021 na himuon ang eleksiyon samtang ang laing usa nagsugyot nga sa Oktubre 2022.

Depende sa mga membro sa Kongreso hain sa duha ang ilang aprobahan. Apan alang nako ang labing importante nga pangutana, kinahanglan ba gyud nga iuswag?

Dako ang akong pagtuo nga labaw kay sa gusto ni Duterte nga makorihian ang wala magkadimao nga termino sa mga opisyal sa barangay ug ang paghatag nila og dugang higayon nga mapatuman ang ilang mga proyekto, paagi ni sa Presidente aron makabintaha ang iyang kandidato sa sunod presidential elections.

Dako ang purohan nga ang iyang anak nga si Davao City Mayor Sara Duterte ang mohulip niya. Kun unya na sa Oktubre 2022 ang sunod eleksiyon sa barangay nagpasabot ni nga sa May 2022 national elections naglingkod pa sa pwesto ang ilang mga kaalyado sa barangay. Sa laktud, kabahin ni sa iyang political strategy.