EDITORYAL - Sugbo
Duna nay madugang nga mga modernong bus de pasaheroan dinhi sa Central Visayas ilabi na dinhi sa Sugbo nga gipanglantawang makatabang og dako sa mga sumasakay.
Gitugotan sa Land Transportation Franchising and Regulatory Board sa Central Visayas nga makapamasahero kining 298 ka mga public utility vehicles ug 250 ka taxi units sa Central Visayas.
Duna pay umaabot nga kapin 200 ka mga buses, taxi ug e-jeeps dinhi sa Sugbo niining tuiga nga mamasahero.
Samtang kadtong unang batch, makasugod na sa pamasahero sa Metro Cebu padung Sibonga ug Danao City. Ang PUV modernization program gikan kini sa leksyon nga nakat-onan didto sa Tacloban City nga diin nagproblema ang gobiyerno kun unsaon paghakot ang mga evacuees padung sa bag-ong relocation sites nga wala may rota didto.
Ang paghatag og pagtugot sa LTFRB sa mga modernong mga pasaheroan nga makadagan sa kadalanan ug mamasahero nakapagaan sa mga sumasakay. Dunay mga destinasyon nga lisod adtoon kay kinahanglang magbalhin-balhin og sakyan ang pasahero, apan karon maagian ra kausa niining mga bag-ong rota nga gitugot.
Samtang tuod nindot kaayo kining modernisasyon sa transport system sa Sugbo, kinahanglan man sab tingaling paspasan sab ang konstruksyon sa mga dugang imprastraktura sama sa road widening, dugang mga karsada ug mga taytayan.
Kinahanglan sab nga dili na tugotan nga makadagan kadtong mga karaan na gyud kaayong mga jeep pasaheroan ug awhagon ang mga drayber niini nga momaneho niining mga modernong pasaheroan sa gobiyerno.
Sa mosunod nga mga tuig gipaabot nga mausab ang hitsura tungod sa mga modernong transport system ilabi na unya og mabutang na ang planong rail transport system sama sa MRT, LRT ug mono rail dinhi ubos sa Cebu Integrated Intermodal Transport System.
Kaning tanan makab-ot kun dili masagolan og pamolitika sa mga lokal nga opisyales ang mga proyekto nga maoy hinungdan kun nganong nabiyaan sa natad sa transportasyon ug mga imprastraktura ang Sugbo.
- Latest