EDITORYAL - Kinsay mag Speaker?

Karong udtong tutok opisyal nga magsugod ang trabaho sa mga bag-ong napiling mga lokal ug nasyonal nga mga opisyal human sa eleksyon niadtong nakalabay nga buwan sa Mayo.

Dunay mga beterano na ug duna say mga bagito pa sa ilang pwesto ug gipaabot nga kining mga bagito mosalida og maayo aron mailhan sila sa mga tawo pinaagi sa ilang abilidad.

Apan samtang ang lokal nga mga posisyon magsugod na sa ilang opisyal nga trabaho, lubog pa kaayo sa Ubos Balay-Balauranan kun kinsa ang piliong House Speaker.

Upat ka mga kaalyado ni Pres. Duterte ang nag-ilog sa maong posisyon. Sila si Pantaleon Alvarez sa Davao, Alan Peter Cayetano sa Taguig, Martin Romualdez sa Leyte ug Lord Allan Velasco sa Marinduque.

Apan gidungog-dungog nga ang kinakusgan sa upat mao silang Cayetano nga running mate ni Duterte niadtong 2016 elections ug si Velasco kinsa suportado sab sa koalisyon sa mga partido nga nisuporta sa presidente.

Maklaro na hinuon sa pamahayag ni Duterte nga silang duha maoy murag maoy iyang gustong pilian. Ang duha dili gusto og term sharing, di sab gusto og ‘toss coin’ nga gisugyot ni Duterte.

Hanap na si Alvarez nga mapilian tungod kay nakasuway naman pagka-speaker apan pinaagi sa impluwensya ug pagpangusog ni Davao City Mayor Sara Duterte natangtang ang kongresista sa maong posisyon.

Ang House Speakership usa ka dakong posisyon sa Kongreso kay magsilbi siyang presiding officer ug lider sa Ubos Balay Balauranan ug maoy ikaupat nga pinakagamhanang opisyal sa nasud.

Bahala og kinsa pay mapili basta ang mahinungdanon sa pagbotar unya sa mga kongresista sa sunod nga speaker, ang interes sa nasud ug sa katawhang Pilipinhon maoy serbisyohan ug dili ang partido o ang presidente sa bag-ong mangulo kanila.

Sama sa gibuhat kaniadto sa mga magbabalaod pinangulohan ni kaniadto House Speaker Manuel Villar nga mipa-impeach kang kanhi presidente Joseph Ejercito Estrada tungod sa mga kahiwian ug kurapsyon.