EDITORYAL - Kinsay maalaot?

May himuong imbestigasyon sa nahitabong pagdasmag  sa panagatan sa China ngadto sa panagatan sa 22 ka mga Pilipino nga ilang gibiyaan  human sa hitabo didto sa kadagatan sa Recto Bank sa West Philippine Sea.

Matud pa nga gusto ni Pres. Duterte nga joint-investigation ang himuon sa mga otoridad sa Pilipinas ug sa China.  Apan wa bay malapas nga balaud si Duterte kun iyang tugotan ang China paghimo og imbestigasyon batok sa 22 ka mga mananagat  nga dinhi man sa sud sa teritoryo sa Pilipinas kadto nahitabo?

Pagdasmag ang termino ug dili dinasmagay ang nahitabo. Base sa unang pamahayag sa mga survivors nagpundo ug nag-angkorahe man sila sa dagat kay tungang gabii naman ug nangatulog na sila.

Sa una nilang pangangkon, gidasmagan sila dayon gibiyaan. Kun sabton og maayo, murag intensyonal ang gihimo sa mga mananagat nga Chinese.

Malisyoso sab ang ilang pagbiya sa mga naglutaw-lutaw nga mananagat nga adtong tungora nangapyot nalang sa kung unsay nagpabiling galutaw.

Madudahan ang crew sa maong Chinese boat nga gusto nilang mamatay sa lawod ang mga Pilipino.

Di ba sila angay gukdon ug taralon sa hukmanan aron masilotan ubos sa atong balaod kay sud sa teritoryo man sa Pilipinas kini nahitabo?

Sa bersyon sa Chinese embassy, aksidente lamang ang nahitabo ug ilang gipagawas nga ang mga Pilipino maoy nisuway sa pagbangga kanila.

Sa ato pa, kun pananglitan ang mga imbestigador sa China motuo sa pangangkon sa ilang kababayan mangapriso ang 22 ka mga Pinoy nga mananagat? Dinhi o sa China?

Nalawgaw na ra ba karon kay kalit nga nibali ang hangin human nga mitingog si Pres. Duterte nga gusto og imbestigasyon ayha pa siya mopagawas og pamahayag bahin sa nahitabo.

Kalit sab nilikoy ang pamahayag sa mga mananagat hasta sa ilang kapitan human sila makaestorya ni Agriculture secretary Manny Piñol nga diin giingong misaad og mga bag-ong bangka ug uban pang hinabang para kanila ug sa ilang pamilya.