Plastic Barter Store

Only in Cebu nga ang mga plastic nga basura bayloan og bugas, canned goods, school supplies, senina, tsinilas, duwaan ug uban pa.

Hinuon naa nay mga programa sa ubang LGU nga ang basura bayloan og noodles ug sardinas, apan kining plastic barter store lahi sa uban kay wholistic ang ilang tumong.

Makatabang na sa mga kabus nga nanginahanglan ug labaw sa tanan makatabang sa pag preservar sa atong kalikopan. Ang upat ka kilo nga basurang plastic bayloan nila og usa ka kilong bugas, duha ka kilong basura usa ka paresan sa tsinilas o depende sa unsa may gusto sa tag-iya sa basura.

Kung sa junkshop tag singko pesos ra man ang presyo sa plastic itandi sa plastic barter store nga mahulog nga dako ang presyo sa mga item nga makuha sa mga tawo.

Kadtong mga batang libod suroy nga mamunit og basura seguradong aduna silay mauli nga bugas o mga duwaan kon sa barter sila moadto itandi sa junk shop nga kwarta ang bugti nga sayon ra nilang magamit sa posibleng bisyo sa hingos sa rugby.

Ang mga basurang plastic nga matigom iproseso nila aron himuong eco-bloc nga maoy gamiton nga materyalis sa pagtukod og mga balay alang usab sa mga kabus.

Kabahin kini sa programa apil ang Balay Samaritano nga gitambayayongan sa mga civic groups.

Prioridad sa maong programa ang mga kabus aron dunay magamit bugti sa mga basura.

Bukas hinoon ang Plastic Barter Store sa mga tubig tubigan apan seguro i donate nalang ang ilang mga basura inay mokuha og baylo nga mga goodies.

Gani mas maayo nga gawas sa mga basura mas maayo nga mohatag usab kadtong mga dato kg mga senina, bugas ug uban pa nga magamit sa tindahan nga ihatag usag niadtong mga nanginahanglan. Maayo kaayo ang naasoyng programa sa pag solbad sa problema nato sa basura nga kasagaran ra ba mga plastic nga maoy usa sa mga makadaut sa atong kalikopan.

Panghinaut nato nga magpadayon kini ug molambo pa o ba kaha molipang sa ubang dapit.

Kong nahimo kini sa pribadong grupo nganong dili man ni himoon sa gobierno?

Unta sinugdanan pa lang kini og himoon kining model sa mga tawong nagpakabana sa kahimtang sa isig ka tawo ug sa atong kalikopan. Ang plastic Barter Store anaa sa dalan Mabini dakbayan sa Sugbo, Kilid sa USPF haduol sa Cebu Metropolitan Cathedral. Bukas ang tindahan Lunes hangtod Sabado alas 8 sa buntag hangtod alas 3 sa hapon. Dawaton ang tanan basura nga plastic gawas lang sa mga tawong plastic og kinaiya.