Mobiya sa BOPK?

Sibaw kaayo ang mga huhungihong nga dunay pipila ka konsehal sa dakbayan sa Sugbo nga mga alyado ni Mayor Tomas Osmeña nga mobali na sa grupo ni incoming Mayor Edgardo Labella.

Apil kuno sa mobali mao sila si Konsehal Dave Tumulak, Alvin Dizon ug si Jun Gabuya.

Apan gihinabi nako ang maong mga konsehal, walay bisan usa kanila nga miangkon nga mobali sila sa Barug-PDP.

Matud ni Konsehal Dizon nga sukad-masukad, wala gayud mahitabo nga nagtapon-tapon siya og grupo. Si Gabuya ug Tumulak hinoon, mga kaalyado sila kaniadto sa Team Rama (Barug-PDP Laban karon).

Para kanako, maayo ra man pud nga mobali sila sa grupo ni Labella basta ilang matan-aw nga matinud-anon ang incoming mayor sa iyang tinguha pagpalambo sa siyudad.

Apan ang husto gyud mao nga bisan og anaa ka sa pikas grupo, mosuporta ka sa mga lakang sa imong kaatbang kun makita nimo nga kini gitumong alang sa kaayohan sa kadaghanan.

Unsaon man gud nga ang sagad nilang himoon maghugpong man sila pagsupak sa tinguha sa ilang mga kaatbang, ilabi na kun maglambigit kini og dakong proyekto nga gigahinan og minilyon ka pesos.

Unta, mausab na ang baruganan sa mga konsehal ug menosan na nila ang grabeng pamolitika.

* * *

Moyukbo ko ni Kongresista Raul V. Del Mar nga bisan og may pangidaron na, apan wala gyuy absent sa mga sesyon sa Kongreso sulod sa 24 ka tuig.

Nagpasabot nga dili gyud magmahay ang mga botante nga mipili kaniya kay wala siya magtinapolan sa iyang katungdanan.

Dili palaaway nga pagka opisyal ug lantip kini og salabotan.

Mao kini ang rason nga si Del Mar kanunay gyud nga modaog ug gani bag-ohay pa lang nga nasublian sa katungdanan sa eleksyon kaniadtong Mayo 13.

Samtang ang ubang kongresista magsige lang og absent, si Del Mar wala gyud magdukaduka atol sa mga sesyon, ug nakapalabang og daghang mga balaod.

Ang laing kongresista dinhi sa dakbayan nga si Rodrigo “Bebot” Abellanosa gihatagan sab og Plaque of Recognition kay wala gihapo’y palta sulod sa unom ka tuig niyang termino.

Nalipay ko kay wala gyud masayop ang atong mga botante dinhi sa  dakbayan pagpili og kongresista nga morepresentar kanato didto sa Kongreso.

Sa Mandaue City unta, maayo sab og agi si Kongresista Jonas Cortes kay sa usa pa lang gani niya ka termino, napahimo niya nga “lone congressional district” ang  siyudad.

Apan mobiya na man si Jonas Cortes pagka kongresista kay mobalik na man siya pagka mayor sa Mandaue City. Aw, mas maayo pud kay basin og daghan pa nga kalamboan sa siyudad nga iyang mapatuman.