Padayon nga problema

Nagsugod na usab ang tingklase ug milyones ka mga estudyante sa tibuok nasud ang busy na usab sa ilang tulomanon sa tulonghaan. Sulod sa napulo ka bulan, ang mga lawak tunghaan maoy ilang ikaduha nga pinuy-anan.

Apan niining pag-abli na usab sa klase, wala gihapon mapapas sa atong panan-aw ang mga suliran nga gisagubang sa atong mga tulonghaan. Padayon kini nga nag-unang isyu nga morag walay kasulbaran sa kagamhanan.

Usa niining maong mga problema mao ang kakulang sa mga classroom sa mga pangpublikong tulonghaan. Sulod sa mga katuigan grabe nga nagpunsisok ang mga estudiyante sa mga lawak tunghaan.

Mao gani nga ordinaryo na nga talan-awon ang mga klase nga anha ipahigayon sa mga barangay sports complex, gymnasiums ug ilawum sa mga dagkong kahoy.

Kini gumikan lagi kay nagsugwak na man ang mga classroom sa mga estudyante.

Gawas sa kakulang sa mga learning materials, usa usab sa seryoso nga problema nga hangtod karon wala gayud kahatagi og kasulbaran sa kagamhanan mao ang kakulang sa mga magtutudlo alang sa mga pangpublikong eskuwelahan.

Tungod usab lagi sa ubos nga sweldo mao nang daghan ang dili na interesado nga mosulod sa teaching profession, ilabi na sa mga government schools. Kini wala pay labot sa dakong obligasyon sa trabaho, ilabina kun adto ma-assign sa kabukiran.

Ang naandan karon mao nga ang mga bag-ong education graduate tua na nagpunsisok sa industriya sa business process outsourcing diin tuay dagkong suweldo sa mga call center. Ang uban mas pilion ang manarbaho sa ubang kanasuran.

Hinuon niining administrasyon ni Rodrigo Duterte, gihimong prayoridad sa kagamhanan ang pagpataas sa sweldo sa mga magtutudlo sa mga public schools. Ambot kun nakapaengganyo ba kini sa mga batan-on pagsulod sa teaching profession. Hagbay ra nga realidad na kining maong mga problema nga padayong milikos sa sistema sa edukasyon sa nasud.

Apan subo usab nga palandungon gumikan kay nagpakita kini og dili maayong kalidad nga mga bunga.