Super Mom+Super Ma’am=Super S

Back to reality na, balik eskwela sugod karong adlawa sa mga pampublikong tunghaan.

Dali ra kaayo ang panahon nga murag wala ra man maalinggati nga nahuman na diay ang bakasyon.

Daghan pa seguro sa mga tinun-an ang wala pa ka move on sa pagligid sa higdaanan nga magpatuyang unsa orasa momata kay walay klase, apan karon balik sa naandan nga magsakripisyo aron makab ot ang kaugmaon.

Bitaw dili lang ang mga estudyante ang gasakripiayo kay ang mga ginikanan ilabi na gyud sa mga inahan nga maoy mangadlawon sa pagluto ug mag andam sa pamahaw ug balon sa mga anak.

Ingon ani gyud ni ang realidad nga kinahanglan maningkamot tungod ug alang sa gitinguhang tingusbawan sa mga anak.

Kadtong mga tinun-an nga nagpuyo sa lagyong dapit nga gikinahanglan pang magbaklay og kilo- kilometro molabang pa og mga sapa gikinahanglan nga kaadlawon mobiya sa ilang balay padung sa eskwelahan.

Samtang kadtong anaa ra sa syudad gikinahanglan gihapon nga momata og sayo aron dili maabtan sa ka huot sa trapiko.

Wala nay kalainan ang sa bukid ug sa syudad ang sakripisyo nga masinatiam basta maka eskwela lang.

Hinoon andam na ang tanang mga tunghaan kay sugod sa unang adlaw magklase na gyud dayon kay naandam naman ang mga classrooms sanglit napangandaman naman kini atol sa gipahigayong Brigada Eskwela sa nakalabayng semana.

Gawas sa mga bata ug mga ginikanan, syempre ang mga magtutudlo usab ang atong palakpakan kay taliwala sa ilang kakapoy sa nakalabayng eleksyon gipadayon nila ang ilang serbisyo sa bridaga hangtod na sa pagbukas sa laing tuig tingtungha.

Kun dunay mga “Super Mama” nga mag atiman sa mga anak, aduna usay mga “Super Ma’am” nga mag atiman sa mga tinon-an sa mga eskwelahan.

Busa angayan nga suklian usab kini sa mga tinon-an nga mamahimong “Super Student” nga mohimo sa mga tahas isip maayong anak ug estudyante. Kini ang paghupot sa gahum sa pagkat-on sa mga leksyon aron molig-on ug mabaid ang kalantip sa salabotan sa pag baton sa kaalam nga maoy labing lig-on nga hinagiban nga dili gyud mabuntog ug makawat sa uban.