Kaluwas sa pagkaon ug tambal
Sukad sa pagtangtang ni Presidente Rodrigo Duterte sa pangulo sa Food and Drug Administration (FDA), duha na ka dagkong bulilyaso sa buhatan ang nitumaw:
Una, ang makapakugang nga pagtuon nga peke ang 80% (288 sa 360 ka brands nga gisusi sa laboratoryo sa Philippine Nuclear Research Institute, PNRI) sa mga suka nga gipamaligya sa mga tindahan ug kamerkadohan; ug
Ikaduha, ang pagtugot nga padayong mabaligya dinhi sa ato ang Ma Ling ug delata nga mga karne gikan sa China ug ubang mga nasud nga natakdan sa African Swine Fever (ASF).
* * *
Inay mangayo og pasaylo nga nalutsan sila sa peke nga mga suka, ang FDA igo lang nipasalig nga ang brands nga nasakpan sa PNRI nga gisagolan og kemikal nga synthetic acetic acid di makadaot sa panglawas, sukwahi sa pasidaan sa PNRI nga mohimong makamugna og kanser.
Apan nakuykoyan ang 49 ka tuig na nilang lagda, ang Administrative Order (AO) 134 nga giluwatan sa ilang inahang buhatan, ang Department of Health (DOH), niadtong 1970, nga nagmando nga ang mga suka nga may artipisyal nga mga sagol sama sa synthetic acetic acid di mahimong ibaligya sa publiko.
* * *
Ambot gipatigbabaw ba lang ang ilang garbo, o niinsistir lang sa ilang kahawod, o unsa pa lain nga posibleng mas malisyoso nga mga hinungdan, nagpaugat ang FDA:
Nagdumili sila sa pagluwat og recall order sa peke nga mga suka, igo lang nipasidaan nga kanselahon ang ilang certificate of product registration (CPR); ug
Nagdumili sila sa paghingan sa peke nga mga suka, bisan sa pag-apura ni Agriculture Secretary Manny Piñol.
* * *
Gi-ban ni Piñol ang mga karne gikan sa mga nasud nga may ASF niadto pang Agosto sa niaging tuig. Karon pang semanaha gipa-recall sa FDA ang Ma Ling ug ubang mga produkto.
Sa ato pa, siyam ka buwan nilang gilawog ang nasud sa mga kagaw sa ASF nga di mamatay ug igo lang matug sa pag-proseso sa karne.
Depektuso ba lang ang mga lagda sa FDA sa pagbantay sa kaluwas sa atong mga pagkaon? O di ang kahimsog sa publiko maoy gipalabi sa mga tagduma sa FDA?
Kon nabulilyaso sa pagkaon, unsay garantiya nga gitarung nila pagbantay ang atong mga tambal?
* * *
- Latest
