Makatabang ba ang endo

Aprubado na sa Senado niini lamang buwan sa Mayo ang balaudnon nga magwagtang o magputol sa kontraktuwalisasyon (ENDO) sa pagpangimpleyo sa nasud sa Pilipinas. Una nang giaprubahan sa Ubos Bay Balauranan niadtong miaging tuig ang susamang balaudnon nunot sa hangyo ni Presidente Rodrigo Roa Duterte.

Ang pagwagtang o pagputol sa kontraktuwalisasyon (ENDO) sa pagpangempleyo dinhi sa nasud usa sa mga saad ni Presidente Duterte niadtong nagpapili pa siya sa pagka presidente.

Karon nga naaprobahan na sa kongreso ang ENDO segurado na gayod kini nga mahimong balaud. Sa pagka balaud sa Endo apektado niini ang pipila ka provision sa Labor Code of the Philippines ug mahatagan na og seguridad ang trabaho sa nasud.

Buot ipasabot nga kadtong mga aduna nay mga trabaho magtrabaho sila hangtod sa pag-abot sa ilang edad sa pagretiro, hangtod nga sila mamatay o mobiya sa ilang trabaho gawas lang kun ilang hatagan og balidong rason ang kompanya nga ilang gitrabahoan sa pagtangtang kanila sa trabaho. Sa laktod nga pagkasulti, ang mga wala pay mga trabaho, magpaabot una nga mamatay, moretiro, mobiya sa trabaho o balido nga gitangtang sa iyang trabaho ang nakatrabaho na sa dili pa siya makatrabaho.

Tinuod, ang pagwagtang sa kontraktuwalisasyon sa pagpangempliyo  makahatag na og seguridad sa trabaho niadtong aduna nay mga trabaho apan dili usab ikalimod nga makahatag kini og kalisod sa pagpangita og trabaho niadtong mga nangita pa og trabaho.

Usa sa mga nag-una nga suliran nga giatubang sa gobiyerno sa nasud mao ang kakulang sa trabaho, gani sigun sa atong nakita, sa usa ka bakante nga trabaho gilinyahan kini sa mga nangita og trabaho.

Kulang pa ang trabaho dinhi sa nasud, busa dili pa hinug ang pagwagtang sa kontraktuwalisasyon. Tinuod nga ang kontraktuwalisasyon dili makahatag og seguridad sa pagpangimpleyo apan makahatag kini og kasayon sa pagpangita og trabaho niadtong wala pay mga trabaho.