EDITORYAL - Kinsay pakasad-on?

Daghang mga kandidato ang nangreklamo sa resulta sa nakalabay nga May 13 local and national elections tungod sa kadaghan sa mga problemang nasugatan sa Commission on Elections nga nakapadelatar ug nakapahunong gani sa pagbotar ug pag-ihap sa mga balota sa pipila ka probinsya sa nasud.

Apan bisan paman niining mga problemaha ang Comelec namahayag nga walay failure of elections nga nahitabo ug gikonsiderar nila kining tanang mga nasinating problema nga gamay lamang ug wala makaapektar sa resulta.

Apan usa ka kowalisyon sa nagkadaiyang pundok sa katawhan nga mao ang Tindig Pilipinas nagmartsa sa Philippine International Convention Center (PICC) ug gipapanubag ang Comelec sa mga kasaypanan ug mga kalapasan nga wala atimana sa maong ahensya.

Sa campaign period pa lang, daghan sa mga kandidato ang klaro kaayong nilapas sa Omnibus Election Code gikan sa posters, tv ug broadcast ads, social media exposures ug daghan pang uban.

Makita ang mga campaign posters bisan asang dapita imbes nga sa campaign poster designated areas ug daghan sab ang naghinobra ang gidak-on sa ilang campaign materials ug uban pa.

Ang Comelec daan nang nanawagan sa publiko o bisan kinsang interesadong indibidwal pagsang-at og pormal nga reklamo diha sa ilang buhatan kun aduna silay makitang mga kandidato nga nakalabas sa Election Code.

Apan wa pay bisan usa ka politiko nga nakasohan karong nakalabay nga eleksyon.

Atol sa eleksyon, daghang mga vote counting machines (VCMs) ang giingong nikagar ug wala mogana mao nga daghang mga botante ang nalangay sa pagbotar ug ang uban namauli ug wala na lang gyud mamotar.

Gawas pa niana, duna say mga pasangil nga vote buying bisan asang dapita sa Pilipinas. Nahimo na gyung kultura sa mga Pilipino ang mobaligya og botos.

Hangtud nga di magtarong ang Comelec sa ilang tahas mapadayon kining pasangil nga ang mga kandidato matag eleksyon sa Pilipinas duha ray kapalaran, ang modaog ang gitikasan.