EDITORYAL - Votes for sale

Ugma pa ang eleksyon, apan daghan nang mga nanggawas nga mga balita ug mga posts sa social media bahin sa vote buying sa nagkadaiyang mga dapit dinhi sa Sugbo ug sa ubang mga probinsya.

Hinuon sa pagkatinuod sayon nalang kaayo karon ang maghimo-himo og estorya. Mas nahimo pa gyung sayon ug daw pagawasong murag tinuod ang mga balita bahin niini pinaagi sa teknolohiya ug internet.

Sayon ra kaayong manguha og mga materyales ug kuhaan dayon og litrato dayon i-post sa social media aron makatap sa uban.

Mahimong kini gamiton aron pagpahumot sa pangalan sa usa ka kandidato ug mas labaw nang gamit kaayo aron dauton ang usa ka kandidato. Ang mga naghimo niini ug kadtong ni-share pulos mga malisyoso kay may motibo man nganong ilang gi-post.

Lisud kaayo kining pamatud-an ilabi na nga dali ra man kaayong maka-deny ang mga hingtungdan ug wala na sab kaayo karoy mga tawong interesadong mag-star witness sa mga kaso sa politika.

Kun duna man, sila kadtong wala nalang gyuy laing kapaingnan ug nagsalig nalang unya sa bawos sa kandidatong ilang gilabanan. Gani, duna gyuy mga botante sa kabarangayan nga mao pay manghagad sa ilang boto baylo sa kwarta gikan sa kandidato.

Ang uban mag-minaro sab, kadtong kinadak-an og palit maoy botaran. Apan duna say uban nga koprason ang kwarta sa mga tanang kandidato apan duna na diay kini kaugalingong napiliang kandidato nga iyang botaran.

Kaning mga kandidatong namalit og boto sa pagkatinuod way kalibotan kun iya ba gyung pangalan ang gibutang sa balota sa tawong ilang gibayran.

Apan subo lang nga daghang mga reklamador bahin sa gobiyerno.

Unsa may katungod aning uban nga maghilas-hilas  og reklamo batok sa klase sa gobiyerno nga naa ang Pilipinas kun ang ilang botos mapalit ra man gihapon sa mga kurakot nga kandidato?

Subo kaayong pamalandungon nga kaning pagpamalit ug pagbaligya sa mga botos nahimo nang kabahin karon sa kultura sa mga Pilipino matag eleksyon.