Gipang-harass

Lupig gyud sa Dakbayan sa Sugbo ang mga silingan niining siyudad kon ang kaguliyang sa eleksiyon maoy hisgotan.

Sayonan ka nga ang mga lider sa usa ka politikanhong pundok gipanghasi man sa mga armadong tawo?

Wala kini mahitabo diha sa Mandaue City, wa usab sa Danao, wa sa Talisay, apan nakadungog ko nga mireklamo ang usa ka kandidato sa Lapu-Lapu City kay gihulga kuno ang iyang mga lider didto sa kaislahan sa Caubian, Olango ug uban pa.

Bitaw, makapanglingolingo kita nga makadungog nga ang kapolisan mura’g mipiit pag-ayo sa mga kandidato nga kaalyado ni Mayor Tomas Osmeña apan wala nila himoa sa mga politikanhong kalihokan sa mga alyado ni Bise Mayor Edgar Labella.

Naminaw ko sa mga report sa radyo niadtong Domingo ug nadunggan nako nga daghan kaayong checkpoint ang kapolisan nga gipahigayon atol nga naghimo og miting de avance ang BOPK sa Cebu City Sports Center.

Mga driver sa motorsiklo nga nag-una sa parade paingon sa Sports Center gipangpara ug gi-inspection, may mga gidakop kay ang driver nagsul-ob lang og sinelas. Apan ang mga nagmotorkada nga nagsul-ob og T-shirt nga “Pulihi Na Cebu” nga mga alyado ni Labella, wala gipahunong sa kapolisan bisan og may uban kanila nga nagsinelas lang sab.

Mao kana nga nagduda si Mayor Osmeña nga ang kapolisan nagpagamit sa mga politiko nga iyang kontra, ug ang pagduda ni Osmeña mora’g may basehanan.

Kaniadtong Domingo sa kaadlawon, balay sa lider ni Osmeña sa Barangay Sudlon 1, girakrakan usab og bala, pero sa dapit ra sa atop ang bala gitumong.

Unya, nabalita usab kagahapon nga ang kabalayan sa mga lider ni Osmeña sa Barangay Tabunan, Tagbao, Sirao, Malubog ug dinhi sa Calamba, gibato sa mga tawo nga nagsakay’g motor.

May konsehal sa Babag nga giteksan nga pabantaybantayon siya kay kuhaonon.

Ang lider ni Osmeña sa Taptap gipangita usab sa mga armadong tawo ug mao nga nahadlok tawon. Pastilan.

* * *

Nalipay ta kay sa Mandaue City, bisan og init ang pagpangampanya nila ni Mayor Luigi Quisumbing ug Kongresista Jonas Cortes pagka mayor, apan wala man ta makadungog nga ang kapolisan nagpagamit sa politiko.

Aw, dili sab tingali gamiton ni Luigi ang kapolisan aron hasion ang iyang kaatbang nga si Jonas kay mosamot nga masuko kaniya ang iyang apohan nga si Dr. Norberto Quisumbing.