Ang pagduda sa kalooy sa Dios

Abril 28, 2019:  Ikaduhang Domingo sa Pasko sa Pagkabanhaw

Mga Pagbasa:  Buh. 5;12-16/Sal. 118/Gip. 1;9-19/Jn. 20;19-31

Dili ikalimod nga daghan nato ang nahimong biktima sa ka unfair sa kinabuhi. Gani nahimong makapangutana kita sa Labaw nga Makagagahum nganong nahitabo kini kanato labina kun sa atong tan-aw naningkamot kitang magpakabinuotan diha sa atong panaw.

Mao nga diha sa atong pagkahilansang sa dautan ug negatibong panlantaw sa kinabuhi, nahimong malisud alang nato ang paghangop sa lab-as nga hangin sa kabanhawan. Ang gininhawa sa kinabuhi nahimong kamatayon alang kanato ug bidlisiw sa panalangin nahimong tunglo alang kanato tungod kay atong nakita nga malisud ang pagsabot kun unsa ang Diosnong kalooy kun ang kalibutan puno sa kapintas ug kabangis.

Patay dinhi ug patay didto. Kaligutgot dinhi ug kaligotgot didto. Dinautay ug panghimaraotay sa usag usa ug kalipay nato kun dunay masakit sa atong binuhatan. Alang kang Tomas malisud ang pagtuo nga ang nalansang nabuhi.

Mao nga normal lamang nga nangayo siya og empirical evidence sa maong taho. Tuod man sa dihang iya kining nakita anha pa siya mipadayag sa iyang pagtuo.

Dili siya dautan tungod lang kay wala dayon siya mohatag sa iyang pagtuo apan ang iyang yanong hunahuna naglisud lang pagtugkad sa maong hitabo.

Ang iyang kasingkasing nahimong natay-og gumikan sa mga nilabay nga panghitabo nga mao ang dugoon nga kamatayon sa ilang magtutudlo.

Kadaghanan nato sama ni Tomas nga magduda sa kinabuhi.

Malimbongon man usahay ang palibot mao nga mangita kita og pagmatuod. Apan luyo ning maong proseso sa pagpangutana kun tinuod ba o dili ang kalooy nga gikan sa Dios, ato pud untang sination nga bisan pa man kun ang Dios dili kahatag sa tanan nga atong gusto apan sa mga higayon sa atong pag-antus ug kalibog anaa siya nag-uban kanato naa siya kanato ug padayon siyang magpabilin sa mga higayon nga malisud alang nato ang kinabuhi.

Kini ang atong pagakuptan sa tanang adlaw sa kinabuhi. Kay after all ang pagtuo mahitungod man sa kalambigitan ug dili lang sa pagtuo sa mga butang nga lisud tugkaron sa atong panghunahuna. Christianity is not only a religion it is a relationship matud pa nila.