EDITORYAL - Kinsa gyud sa duha?

Dako kaayo ang kalainan sa resulta sa imbestigasyon sa duha ka mga dagkong law enforcement agencies nga nagsubay sa kaso ni Christine Lee Silawan dihang nadakpan na ang lain na usab nga suspek sa maong linoog nga krimen.

Ang National Bureau of Investigation-7 una na nidakop sa 17-anyos nga kanhi uyab ni Silawan diha ra gihapon sa Dakbayan sa Lapu-Lapu base sa nakuhang mga footages sa CCTV camera nga nagpakitang siya maoy kataposang nakauban sa biktima.

Ang batan-on kusganong nihimakak sa pasangil ug gisuportahan kini sa pamahayag sa iyang mga kabanay ug higala nga wala kini kalambigitan sa pagpatay kang Silawan diha sa Sitio Mahayahay sa Barangay Bankal sa maong siyudad. Apan niadtong Martes, nadakpan sab sa kapolisan sa Lapu-Lapu ang 42-anyos nga drug suspect apan apil sa lista sa mga “persons of interest” sa kamatayon ni Silawan.

 Ang maong lalaki nakonsensya ug gikatahong miangkon nga maoy nagpatay ni Silawan gamit ang gunting.Tungod kadto sa grabe niyang kaibog sa dalagita.

Sa iyang pangangkon, iyang napatay ang biktima kay dili gustong makighilawas kaniya nga nitakdo sab sa resulta sa autopsy sa PNP Medico Legal nga nag-ingong wala silay nakitang timailhang nahilabtan si Silawan.

Sama sa pangangkon sa NBI, ang kapolisan nangangkon sab nga duna sab silay nakuhang CCTV footage apan ang ilang nakita mao ang 42 anyos nga suspek ang kataposang kauban ni Silawan ug uban pang ebidensya.

Kay managlahi man ang ilang mga suspek miisa gyud ang kilay sa publiko, kinsa may nagtug-an sa tinuod?

Apan samtang wala pay napamatud-an kun kinsa gyud sa duha maoy sad-an, maayong magtinabangay ang duha aron mapalig-on ang kaso.

Kun mapamatud-an sa korte kun kinsa sa duha ang tinud-anay nga mamumuno, nan makaingon gyud ang publiko nga gidungog gyud ang mga pag-ampo.

Mataral ang tinud-anay nga kriminal ug mabuhian ang inosente, samtang mahatagan sab og hustisya si Silawan.