Alyansa

Napawong ang tanang pangindahay sa kampo ni Bise Gobernador Agnes Magpale nga makuha ang suporta sa Hugpong ng Pagbabago (HNP) ni presidential daughter ug Davao City Mayor Sara Duterte.

Kini human selyohi sa HNP ug sa One Cebu Party ni Third District Rep. Gwen Garcia ang panag-alyansa niadtong Biyernes didto sa lungsod sa Liloan.

Ang pormal nga panag-alyansa  sa HNP ug One Cebu naghatag kang Garcia sa tibuok pwersa sa Duterte supporters aron paluyohan ang iyang kandidatura pagkagobernador sa Sugbo batok ni Magpale.

Sa pikas bahin nahilis og maayo ang pwersa nga nagpaluyo ni Magpale human ang ilang mga kaalyado kanhi sa Liberal Party naglumba og pasakop sa PDP-Laban kinsa nagpaluyo sab ni Garcia.

Bugtong makinarya nga nahabilin karon ni Magpale mao ang iyang lokal nga partido nga mao ang BAKUD. Duna tinuod silay alyansa uban sa NPC apan way kaugalingong pwersa ang maong partido dinhi sa Sugbo, kun duna man dili igo nga makasakbang sa pwersa sa administrasyon.

Ang pangutana igo ba ang balwarte sa BAKUD aron pagtuboy kang Magpale sa kadaugan? Duna hinuoy nahabilin niyang bintaha batok sa iyang kaatbang—ang kwarta sa Kapitolyo.

Tungod kay si Magpale ug ang iyang runningmate nga si Gov. Hilario Davide III maoy naglingkod sa probinsiya, mahimo nilang pahimuslan ang bahandi sa lalawigan aron iduso ang ilang kandidatura.

Kinsa may manulisok nilang Magpale ug Davide kun manghatag sila og hinabang gikan sa Kapitolyo dungan sa ilang pagpangampanya?

Kinsa may magbuot nila og boboan og proyekto ang kalungsoran aron hayloon ang mga opisyal pagpaluyo sa ilang kandidatura?

Di hinuon garantiya ang puntil sa Kapitolyo aron sila modaog. Ang hukom pabiling anaa sa kamot sa mga Sugboanon kinsa ang ilang pilion.

Ang labing lig-on nga hinagiban sa usa ka kandidato aron modaog sa eleksiyon dili ang partido nga iyang gipasilongan kondili ang mga lihok nga iya nang napakita.

Ang tanang butang nga nabuhat sa usa ka politiko nga nakahatag og kaayohan sa labing kabus nga nagkinahanglan motatak ni sa huna-huna ug kasingkasing sa mga botante.

Way bisan unsa nga campaign slogan ang makahulip sa konkreto nga mga proyekto nga napahimuslan sa katawhan. Ug kana maoy labing tinuod!