Way katungod ang mga anak gidonar nga property sa amahan
Dear Atty. Divine,
Duna koy property nga gi-donate sa akong mga ginikanan ngari nako. Nakapangan kini nako ug sa dihang nasakit ang akong asawa napugos ko sa pagbaligya og portion niini.
Karong bag-o namatay ang akong asawa ug ang akong mga anak gusto nga ibaligya ang nahibiling yuta nga hinatag sa akong mga ginikanan apan misupak ko niini kay wa na koy laing property kun ako kining ibaligya.
Apan usa sa akong mga anak namugos gyud kay matud pa niya duna sab silay katungod sa maong yuta. Ang akong pangutana kun makapugos ba ang akong mga anak pagbaligya sa property nga nakapangan man kini kanako? Naa bay katungod ang akong mga anak sa maong yuta? Daghang salamat.
Mike
* * *
Dear Mike,
Basi sa Art. 109, par. 2 sa atong Family Code kini nagkanayon nga ang property nga naangkon sa bana or asawa pinaagi sa donasyon magpabilin kini niyang exclusive property.
Buot ipasabot nga ang yuta nga imong nadawat gikan sa imong mga ginikanan imo kining exclusive property so dili makabuot ang imong mga anak ug wa sab silay katungod niini samtang ikaw buhi pa.
Kun ang imong desisyon dili ibaligya ang maong property then imong pagbuot ang matuman ug dili makapanghilabot niini ang imong mga anak kay ikaw tag-iya sa maong property. Thanks and God bless.
Atty. Divine
* * *
Alang sa inyong pangutana ipadala lang pinaagi sa email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
