Pagpuo sa mga opisyal sa San Fernando

Nagkadako na gayud kining isyu sa mga pagpatay sa mga opisyal sa lungsod sa San Fernando. Wala pa gani masulbad ang kaso sa pag-ambus sa mayor sa maong lungsod, adunay insidente na usab sa pagpatay. 

Kaniadtong Sabado sa buntag, usa ka konsehal sa maong lungsod ang giluthang na usab. Si Alfonso Donaire IV ang gipusil patay sa mga nagsakay og motorsiklo didto sa Ramon Magsaysay, Zamboanga del Sur.

Hangtud karon, wala pa nato matino sa kapolisan didto sa Zamboanga Del Sur kun kinsa ang mga mamumuno ug hinungdan sa pagpusil kang Donaire. Ambot kun adunay kalabotan na ba usab kini sa negosyo sa illegal nga druga.

Ang ato lamang nahinumdoman nga ikalima na si Donaire nga opisyal sa San Fernando nga gipatay sukad sa niaging tuig. Ug matud pa sa imbestigasyon sa kapolisan, kadaghanan sa mga biktima nalambigit kuno sa ginadiling druga.

Ang iyang pagpatay nahitabo human usab sa pag-ambus sa sakyanan ni San Fernando Mayor Lakambini “Neneth” Reluya didto sa siyudad sa Talisay samtang padulong kini sa dakbayan sa Sugbo usa ka bulan na ang nakalabay.

Sa maong hitabo, patay ang bana sa mayor nga si Association of Barangay Councils President Ricardo Reluya, laing empleyado sa munisipyo ug ang drayber sa maong sakyanan. Swerte lamang nga tapsing ang mga samad sa mayor.

Unsa may sangpotanan niining mga sunodsunod nga pagpatay sa mga opisyal sa San Fernando? Unsa kahay dagan karon sa operasyon sa munisipyo sa maong lungsod nga piang na man ang konseho niini?

Gani wala nay balita kun asa na ang bise mayor sa maong lungsod kinsa wala na igkita human mi-file og indefinite leave of absence. Nahadlok siguro ang maong opisyal, kinsa igsuon sa giingon nga usa ka drug lord, kay mikagiw na man kini.

Hinuon angay lamang nga ipailalum sa superbisyon sa Commission on Elections ang maong lungsod gumikan niining maong insidente. Kini ilabina nga pulitika ang motibo nga gisubay karon sa otoridad sa nahitabong pag-ambus kang Mayor Reluya.