Oplan Baklas

Unsa man ni? Operation ni sa Comelec. Sugod sunod semana, Martes, Feb. 12, ang Comelec manangtang sa mga campaign materials nga wala mabutang sa gi-designate nga mga common poster areas.

Magsugod ang campaign period sa mga kandidato pagka-Senador ug pagka-party-list representatives karong Martes, samtang ang alang sa mga local candidates unya pa sa Marso 29. Sa ato pa, alang sa mga local candidates, makapatuyang pa sila pagtaud sa ilang mga campaign materials ... bisag asa.

Hinuon, matud ni Acting Cebu Provincial Election Supervisor Jerome Brillantes, ila unang pahibaw-on in advance ang mga hingtungdan pag-voluntarily remove sa ilang mga campaign materials nga illegally posted.

Ang Sec. 9 sa RA 9006 kon Fair Elections Act nagkanayon: “The Comelec may authorize political parties and party-list groups to establish common poster areas for their candidates in not more than 10 public places such as plazas, markets, and barangay centers, among others, wherein candidates can post, display, or exhibit election propaganda.”

Ang gidak-on sa maong mga propaganda materials, dili molapas sa 12 by 16 feet. Mahimo nga makabutang o makapapilit sila sa ilang mga campaign materials sa pribadong mga lugar, basta mananghid lang sa tag-iya.

Ang Oplan Baklas Team langkoban sa Comelec, police, fire department, ug city o municipal engineers.

Pahimangno ni Brillantes:  “If they fail to get it within three days and if there is no response, we will take it as presumption of consent. After that, we can file cases against them for their election offense.”

* * *

Niining isyu bahin niining nagkadaghan ug nagkagrabe nga pagkabadlongon  sa ato karong mga batan-on, niingon ang DSWD nga focus on family kuno, instead of punishment.  Nindot paminawon. Apan, unsaon?

Sa atong makita sa telebisyon didto sa kaulohan, ang mga minor de edad nga kabataan, manglabay og bato sa mga sakyanan, mokatkat sa atop sa nagdagan nga sakyanan, ug mangabli sa pultahan ug manghasi sa mga pasahero, ang uban, mag-atang tunga sa dalan, ug mokalit paglikay ini’g kaduol na sa sakyanan.

Ang uban nalambigit na’g akyat bahay, ug panulis sa mga mall, gawas niining mga panglabni ug panguot.

Unsaon man ni sila? Wa ni sila mahibawo sa ilang gipamuhat gumikan sa pagka-linghod pa sa ilang mga edad?

Akong usbon, tubag sa DSWD: focus on family instead of punishment, kay matud pa, last recourse na kuno kining pagpahamtang og silot ngadto sa badlongon nga kabataan. Among others ipatunhay kuno ang responsible parenthood.  Na, hala!