EDITORYAL - Suicide bomber?

Gisusi karon sa Department of National Defense kun dunay lapso sa seguridad kun nganong nakalusot ang mga bombers didto sa Our Lady of Mt. Carmel Cathedral sa Jolo, Sulu nga gikamatay sa kapin 20 ka tawo ug nakaangol og 100 ka tawo niadtong Domingo.

Kini human nga ang kalihim sa DND nga si Sec. Delfin Lorenzana gikutlo  sa tigpamaba sa Malacañang, Salvador Panelo, nga daan ng nipasidaan ang kalihim bahin sa hulga diha sa mga simbahan mao nga gimando ang pagbutang og mga tropa duol niini.

Apan magunsa man nang daghang sundalo o polis kun ang mangatake desidido gyud ug magpakaaron-ingnong manimbahay?

Gawas pa niana, kun tinuod o makompirmar sa kapolisan nga posibleng ang usa sa mga namomba suicide bomber gyud, mas dako kining hulga sa katawhan ug bisan sa mga tropa sa gobiyernong nagbantay.

Ang suicide bombing gigamit nga taktika sa mga panatikong Islamists didto sa Middle East sama sa gihimo sa mga Islamic State of  Iraq and the Levant (ISIL) nga nahimong ISIS karon.

Kun mao kini ang nahitabo sa Jolo, bag-o kini nga pamaagi sa mga terorista aron makasigurong molampos sa ilang yawan-ong tumong. Ug tingali, mao pa kini ang labing unang higayon dinhi sa Pilipinas nga ang mga lokal nga terorista migamit sa maong taktika.

Nagpasabot kini nga mas nilawom og dulot ang pagka-panatiko niining mga terorista sa hiwi nilang paghubad sa ilang relihiyon nga dugay ng gikorihian ug gisaway sa mga batid sa relihiyong Islam.

Ang pila ka dekada nang kagubot sa Mindanao maoy gitumbok nga hinungdan nga adunay mga kabataang Muslim ang diskompiyado sa gobiyerno. Mao kini ang nagtukmod sa uban nga mokuyog sa mga rebeldeng grupo ug ning bag-o kining mga teroristang Islamist.

Bugtong pamaagi nga mapakgang kini mao ang paghatag sa tinud-anay nga panginahanglan sa mga tawo didto sa Mindanao ug dili lang ibase sa politikal nga rason kondili ang makitawhanong tumong.