Pagpalambo sa railway sector
Usa sa lakang nga makapalambo sa pampublikong transportasyon sa Pilipinas mao ang pagpabalik sa sektor sa train isip kabahin mass transport system sa nasud. Nasulayan na kini sa unang panahon ug angay lamang nga ipabalik kini sa kagamhanan.
Pipila ka bulan paglingkod ni Presidente Rodrigo Duterte, adunay mga taho nga balikon sa kagamhanan ang railway sector sa nasud.
Maayo kini nga ideya isip usa sa mga lakang pagpalambo sa sistema sa atong transportasyon.
Gani adunay mga taho nga adunay dakong plano ang kagamhanan nga likoson ang Mindanao og relis sa train.
Sama sa Luzon, dako nga isla ang Mindanao ug daghan ang nakakita nga haom gayud ang railway system sa maong rehiyon.
Hinuon magtangag gayud og dakong salapi ang katukoran sa railway system dinhi sa nasud.
Dili tiaw ang kadako niini nga proyekto sa inprastraktura. Ug magkinahanglan kini ug dagko nga mga mamumuhonan kinsa mobubo og bilyones ka dolyar.
* * *
Hinuon nindot kining nahunahunaan ni kanhi Presidential Adviser for Political Affairs Francis N. Tolentino, kinsa misugyot karon nga angay ang pondo sa giabolis nga Road Board nga igahin alang sa pagpalambo pag-usab sa railway sector sa nasud.
Matud ni Tolentino, ang kanhi chairman sa Metropolitan Manila Development Authority (MMDA), nga nagkinahanglan karon ang nasud og efficient ug reliable nga mass transport system aron pagsulbad sa problema sa kakulangon sa mga pampubliko nga sakyanan ug sa grabe nga kahuot nga kalsada ilabina sa mga urban areas.
Miingon si Tolentino, kinsa usa ka abogado, nga angay gayud nga palamboon ang railway system sa nasud tungod kay dako kini og ikatabang sa dali nga pag-transport og mga biyahedor ug mga produkto.
Isip pagpakusog sa pagpalambo sa ekonomiya sa nasud, alang kang Tolentino nga mas maayo nga hatagan og dako nga pagtagad sa kagamhanan ang mass transport system sa nasud sama sa pagbuhi pag-usab sa railway sector.
Mao nang nakahunahuna si Tolentino sa pagsugyot nga mas angay gamiton ang pondo sa giabolis nga Road Board ngadto sa katuyoan pagpalambo sa railway sector sa nasud.
Alang kanako maayo kini sa suhistiyon.
- Latest