Mabasol ba si Duterte pag-away’g Bishops?

Dili tanang bishops ug kaparian anti-Duterte. Aduna poy pro-Duterte. Makapahibulong kay samtang ang sugo sa Ginoo, ‘Love’, may bishops nga mikontrang Duterte.

Di ba miingon ang Ginoo, nga ‘love your enemies?’ Busa, nganong may kaaway mang presidente ang bishops nga ang two greatest commandments nag-ingon man: “Higugmaa ang Ginoo labaw sa tanan sa tibuok nimong kasingkasing, sa hunahuna ug sa kalag. Higugmaa ang imong isi’g-katawo sama sa paghigugma sa imong kaugalingon?”

Unya, nganong magbaton man tag kaaway, nga ‘love’ man Iyang sugo?

Sa akong bahin, dili maayong magbaton og kaaway. Bahala nag ang uban nag-isip nako nga ilang kaaway, basta ako walay kaaway. Kay pulos gugma gud Iyang sugo.

Maong makapakutaw sa utok. Nganong may bishops, kinsa daw dili na mohunong sa pagpakigkontrang Duterte nga unta silang kaparian sayod man nga ning ilang pagpakigkombati sa presidente sa Pilipinas, pareha ra sa gikontra nila ang Ginoo?

Sa Kristohanong pag-analisar, kun ang obispo magpabiling anti-Duterte, sama ra nga sila anti-Christ usab? Dili ba, dihang gilansang sa krus si Hesukristo, gilud-an, gibunalan ug gibugalbugalan sa mga kaaway’ng Hudeyo, unsay Iyang gibawos?

Gugma! Mihangad Siya sa langit ug mihangyo sa Ginoo nga nagpadala Niya dinhi sa kalibotan: “Amahan Ko, pasayloa sila kay wala masayod sa ilang gibuhat?” Wala gyod Niya awaya Iyang mga kaaway. Iya gihapong gimahal. Gihigugma!

Dili ba, mao man kini ang pagtulon-an nga hasta kapila ninyo balikbalika’g wali ngadto sa katawhan sulod sa simbahan? Then why, can’t you, bishops, practice what you preached?

Okay, katungod sa kaparian ang paggiya sa karnero nga nahisalaag. Misyon, ang paghatag og kahayag sa mga hunahunang nangitngitan.

Kun may kaaway, kamo gyuy unang moduol ug makipag-uli sa maayong kabubut-on.

Kun kaaway dili maminaw, mangitag laing suod kahigalaan nga motabang sa pagpasig-uli sa nagubang relasyon.

Ug kun dili siya modawat, mao kining panahona nga pik-on ang mga tuhod atubangan sa altar ug ato na lang iampo sa Ginoo nga lamdagan sa Iyang kahayag ang nagngiob kaisipan sa atong igsoon.

Ug gibuhat ba kini sa mga bishops nga magsige’g kontra ni Duterte? Kay kun wala…aw, matubag na sa katawhan ang pangutana sa mga pro-Duterte: “Mabasol ba si Duterte sa pagpangaway’g bishops?”