EDITORYAL - Himuong Legal

May gamay nang kahayag ang mga drayber sa habal-habal ug sa motorcycle -hailing app nga Angkas  nga posibleng ma-legalized ang ilang matang sa panginabuhian.

Apan sukwahi sa gipaabot nga mga Sugboanong mga magbabalaud maoy mangusog kay dinhi maoy banha kaayo bahin sa pagdeklarar nga ilegal ang ilang operasyon, si Rep. Rufino “Ruffy” Biazon sa Muntinlupa maoy niduso og balaudnon bahin niini.

Ang maong balaudnon ni Biazon nga House Bill 8822 nagtinguhang amendahan ang pipila ka parte o probisyon sa kasamtangang Republic Act 4136 o ang Land Transportation and Traffic Code nga nagdili paggamit sa mga motorsiklo isip pangpublikong pasaheroan.

Kun mapasar kini sa Kongreso may kasigurohan na ang mga naapektahang drayber nga di na silang dakpon.

Ang Angkas nga usa karon sa labing paspas nga alternatibong matang sa transportasyon sa dihang wala pa kini did-i pag-operate nakatabang gyud sa mga sumasakay tungod sa mas paspas nga pag-abot sa ilang mga destinasyon. Pinaagi sa paspas nga transportasyon minilyon ka pesos nga economic activities ang wala mausik. Kini tungod kay ang kasamtangang transport system sa nasud grabe ka problemado tungod sa kakuwangon sa imprastraktura nga niresulta pirme sa pagkabara sa trapiko diha sa kadalanan.

Kay pinaagi sa mga pasaheroang motorsiklo, makalusot-lusot ra man kini sa traffic ug makapili og alternatibong paspas nga agianan padung sa destinasyon, butang nga di mahimo sa ordinaryong pasaheroan.

Ang balaudnon ni Biazon nagmando nga kinahanglang mokuha gyud og prangkisa gikan sa LTFRB ang mga motorsiklong pasaheroan.

Angay tingaling himuong rekisitos ang drug testing, motorcycle handling, ug mga road safety trainings sa mga drayber alang sa kaluwasan sa mga pasahero ayha pa sila hatagan og prangkisa

Dinhi sa Sugbu, si Cebu City Mayor Tomas Osmeña midupa sa maong mga apektadong mga drayber. Daghan ang nagduda sa iyang tumong kay lagi dili kalikayan nga dudahan siyang namolitika kay hapit naman ang eleksyon.