Fake news sa Mandaue

Mura’g init gyud tingali kaayo ang politika karon diha sa Mandaue City kay may naghimo na man og “fake news” aron mapaboran ang kampo ni reelectionist Mayor Luigi Quisumbing.

Nabasahan nako sa Facebook ang balita nga gipatuong gipublikar kuno sa usa ka tabloid sa Sugbo (dili sa Banat News) nga giisa ni Davao City Mayor Sara Duterte ang kamot ni Luigi kay mao kuno ang kandidato nga gisuportahan ni Presidente Duterte.

Apan dili man diay tinuod. Nakakatawa ko kay pwerteng nakapanghimakak sa kadagkoan sa mao nga mantalaan nga dili ila ang maong publikasyon.

Gitan-aw gyud nako pag-ayo, mora’g makatuo ka gyud, apan masakpan nga gihimohimo lang kay ang presyo sa mantalaan nga gibutang didto P3 ra ang kantidad. Tag P8.50 na man gud ang tabloid dinhi sa Sugbo karon.

Dili ko moingon nga buhat kini ni Mayor Quisumbing, apan sigurado nga gihimo kini sa iyang mga dumadapig. Maayong badlungon ni Luigi ang iyang mga dumadapig nga dili maghimo’g fake news kay ma-bad image hinoon sila.

Ambot unsa kaha ang baruganan niini sa kontra ni Quisumbing nga si Kongresista Jonas Cortes. Sila man maoy magtigi pagka mayor sa Mandaue.

Dinhi sa dakbayan sa Sugbo, wala pa ko makabantay og mga fake news ug wala pa mahitabo nga naglantugi sila si Mayor Tomas Osme?a ug Vice Mayor Edgar Labella.

Mora’g banabana nako, dili gyud ni magkalantugi sila si Osme?a ug Labella kay ang bise mayor kalmahon nga pagkatawo.

* * *

Nindot bitaw ang sugyot ni Gobernador Imee Marcos nga angay’ng palambuon gyud sa atong mga opisyal sa kagamhanan ang maritime transportation isip paagi pagsulbad sa nagkagrabe nga problema sa trapiko.

Kadtong mobiyahe paingon sa Naga ug ubang coastal municipalities, mahimo nga mosakay na lang sila og fastcraft kay paspas pa ang biyahe, kay sa mag-PUJ nga ma-traffic ka og mga duha ka oras.

Pananglit sa dakbayan sa Sugbo paingon sa Lapu-Lapu, ug paingon sa Danao, mahimo ra nga mag-fast craft. Bi, estudyuhi kuno ninyo kining sugyot ni Imee Marcos kay sa akong tan-aw, nindot kining maong paagi.

Dili na gyud mabangbang pa ang kadaghan sa mga sakyanan karong panahona kay wala nay kontrol ang kagamhanan ug bisan kinsa na lang ang gitugotang makapalit og sakyanan bisan og walay grahean.

Unya, dili sab kaayo estrikto ang pagkuha og lisensya mao nga pwerteng daghana nga nag-drive og mga sakyanan ug ang uban kanila dili mosubay sa lagda kay wala man masayod niini.

Malipay gud ko kon kanunay lang nga mag-holiday aron walay traffic, o kaha bakasyon nga walay klase.