Maayong laktawan ang LTFRB
Nipasalig ang transport groups nga boluntaryo silang molaslas sa plitehan sa public utility jeepneys (PUJs) kon motidlom ang presyo sa krudo ngadto sa P38 matag litro.
Apan bisan sa pito ka sunudsunod nga semana sa pagbarato sa lana nitataw sila nga di pa mapaubsan ang plitehan kay P44 pa ang litro sa kinabaratohan nga krudo.
Mao ni ang pait nga sugilanon sa mga pasahero. Kon mosaka lang og diyutay ang presyo sa lana, sibaw dayong awhag sa uminto sa plitehan, pakapinan pa og hulga sa welga. Karong dako nang us-os, way naglangas sa paglaslas.
* * *
Di katabang sa kawsa sa mga pasahero ang kainutil sa Land Transportation Franchising and Regulatory Board (LTFRB).
Mangiyugpos ra silang magpaabot sa ilang mga buhatan kon may mga reklamo o petisyon ba nga ipasaka.
Kun duna may makapasaka og petisyon nga kinahanglang bayran, modangop ang LTFRB sa ilang proseso nga siyam-siyaman una mahuman. Ma-aksiyonan lang nilang mga petisyon sa uminto sa plitehan kon mobarato nang lana.
Sa pikas nga bahin, maatiman lang ang mga petisyon sa us-os sa plitehan kun mobalik na sab og mahal ang lana.
* * *
Di balido nga rason alang sa transport groups ang pagsupak sa us-os sa plitehan tungod sa kahigayonan nga mosaka pagbalik ang presyo sa lana.
Sama nga wa sila mosugot sa nangaging mga higayon nga i-uswag lang una ang pagpausbaw sa plitehan tungod sa kahigayonan nga mobalik og barato ang lana.
Samang di makiangayon nga gipasagdan lang sila sa gobiyerno nga maoy direktang nag-um-om sa sunudsunod nga uminto sa lana sayo ning tuiga, di sab maayo nga palawayon lang ang mga konsumidor sa bentaha nga ila karong napahimuslan.
* * *
Kay wa pa man gyud kaumol ang LTFRB og tarung nga formula sa automatic nga pagtakda sa plitehan sa mga sakyanang pamasahero matag higayon nga mosaka o motidlom ang presyo sa lana ug ang presyo sa nag-unang palaliton, maayo tingali nga ang mga pasahero ug transport groups ang magda sa buot.
Mangahas ko og sugyot nga laktawan nila ang LTFRB ug direkta silang magsabutsabot unsaon pagtakda ang labing makiangayong plitehan.
Kay kon padayong magpaabot kanus-a mokihol ang LTFRB, dako ang kahigayonan nga, sama sa naandan, siyam-siyaman.
* * *
- Latest
