Anti-rabies vaccine nagnihit

Miyembro sa medical team sa Regional Health Office, Region VII, mipahibalo nga ang Department of Health wala nay igong pundo sa anti-rabies vaccine nga iindyeksiyon sa tawo nga mapaakan og iro.

Nagsugod ang paghinayhinay’g kahilis sa ilang stocks sa maong tambal dihang mibuto ang makalilisang issue sa Dengvaxia nga hinimo sa Sanofi Pasteur, diin imbes maprotektahan ang pasyente nga i-immunize ini, nangasakit hinuon ug duna gyuy uban nga nangamatay.

Hangtod karon daghang ginikanan ang nangahadlok kon unsay dangatan sa ilang mga anak nga ilang gipaindyeksiyonan og Dengvaxia.

Gisubay sa bag-ong administrasyon ang kutay sa linya kon kinsang mga lidera sa nasod ang angay manubag ning kontrobersiyal nga medisina, diin binilyon ka pesos ang nagasto sa gobiyerno sa pagpalit niini.

Gumikan sa maong hitabo, gusto sa Department of Health  nga iuli sa Sanofi Pasteur ang P3.5B nga nabayad sa Pilipinas isip refund, apan wala gyod mamati ang higanteng French pharmaceutical.

Busa, nakahukom ang DOH ubos sa panabang sa  Office of Solicitor General, nga ilang paylag kaso ang Sanofi.

 Ug dinhi magsugod ang dakong gubat sa Pilipinas batok Sanofi products. Busa hingpit nga giundang sa Sanofi ang pagsuplay sa maong vaccine dinhi sa atong nasod.

Kaniadto, dihang among silingan napaakag iro, midangop dayon kini sa Guadalupe Health Center, diin ang kada vial sa Sanofi anti-rabies tag                        P1,500 ra.

Unya, saw-an pa gyud nig tulo ka pasyente aron makamenus sa bayad ang matag usa, mahimong tag P500 na lang. Dinha pay government clinic kanhi nga ang bayran, P200 ra.

Apan niining bag-o nga dili na Sanofi ang gitener sa DOH, ang presyo tag P4,000 to P6,000 na ang per vial. Busa, gihangyo ang katawhan nga magmabinantayon ug magmainampingon nga dili mapahitan og iro. Usab, gihangyo ang tanang tag-iya nga patirahan og pet anti-rabies ang ilang binuhing iro.

Ug labing maayo gyod unta, nga maghimog balaod ang gobiyerno nga ipatuman gyud kini. Ang mosupak, silotan!