Pagleksiyon sa mga drayber

Gusto gyud ni Konsehal Jun Gabuya nga ipatuman na sa mga traffic enforcers ang ordinansa nga gipasar sa Cebu City Council ug gipirmahan na ni Mayor Tomas Osmeña nga nagtugot kanila pagsakmit sa lisensya sa mga driver nga makalapas sa balaod.

Masabot kaayo nga gusto gyud ni Gabuya nga maleksiyon ang mga badlungong drivers nga kiat kaayo sa ilang pagmaneho og sakyanan nga maoy usa sa hinungdan nga maproblema kita sa trapiko.

Kini sama sa pag-counterflow ug pagpaugat nga bisan og “go signal” na, maghunong diha sa karsada.

Angay’ng dayegon si Konsehal Gabuya kay ingon niini ang tawo nga angay natong palingkuron diha sa Cebu City Council nga motrabaho gyud.

Tan-awa ra gud unya kon manakmit na og lisensya ang mga traffic enforcers sa CITOM, mapitol na gyud ang mga badlungong drivers.

Gitan-aw na karon ni CITOM operations chief Isko Ouano kon napublikar na ba ang maong ordinansa kay aron ipatuman nila dayon.

* * *

Ang amigo nako nga politiko nakabasa sa atong lindog sa miaging Sabado. Gikontak ko niya aron magpakisayod.

Ambot nganong wala man siya direkta nga mikontak kang Dr. Paulus Ca?ete nga maoy nagplano paghatag og inisyal nga P100,000 ngadto sa Vicente Sotto Memorial Medical Center para makakaon ang mga nagbantay sa mga kabus nga pasyente nga taga 6th district.

Tingali mauwaw siya nga ingnon ni Dr. Paulus nga misundog lang sa iyang ideya.

Dili man tingali na ikauwaw, ug tingali malipay pa gani si Paulus kon dunay ubang politiko nga mosundog sa iyang paagi pagtabang sa mga pobre nga lumulopyo sa Mandaue City, Cordova ug Consolacion.

Ang makalahi lang tingali niini kay kadtong politiko nga nagpakisayod nako basin og pundo sa kagamhanan ang iyang gamiton, lahi kang Dr. Paulus nga kaugalingon niyang kuwarta ang gigamit.

Daan pa ko nga daghan gyud ang ganahan sa maong sistema sa pamolitika, kay sa samang higayon makatabang kini sa mga kabus.

Hala, kamong ubang politiko diha, ayaw kaikog sa pagsundog sa gihimo ni Dr. Paulus Ca?ete aron matabangan nato ang mga pobre.

Ang hatagan sab ninyo mao ang mga lumolupyo sa inyong distrito. Makasabot man ta nga kay si Dr. Paulus milansar man pagka provincial board member sa 6th district, ilimit ra sab niya sa iyang distrito ang tabangan.

Wala pa mi magkakita si Dr. Paulus pero nakadungog ko nga siya ang presidente sa Sugboanong mga Kumentarista nga Nagpakabana (SUKNA), kauban ra namo sa media kay tag-iya man usab siya og estasyon sa radyo.