Kalagkalag – Pasko sa Kasakit
Ini’g ka-Oktobre 31, magpanon na pud ang mga pasahero paingon sa mga terminal aron manguli sa tagsatagsa nila ka lungsod o mga probinsya.
Kaniadto sa diyutay pa ang trak, ning maong adlaw, luoy sud-ongon ang panag-ilogay’g lingkoranan sa mga mamauliay, kinsa daw mga umang nga naglumbaanay’g katkat sa bungbong agi sa binuksang bintana. Usahay, aduna gyuy mahapla sa yuta ug maumod bugdong dughan sa nakapanghupawng karsada.
Tungod pa lang sa Cebu City Medical Center, manugat na ang mga pasahero sa bus ug mag-iyahay’g kinatkatay aron maoy makauna pagkuhag kalingkoran. Ang makalagot, kay dihang nakasakay na, alihan sila sa mga malditong dispatser, kinsa naglingkod nang daan ug pabayron sila kay ang mao kunong lingkoranan gireserba para sa mga pasaherong gustong makalingkod. Pagkahayop!
Ingon niini kahasol ang masinati sa mga kapasaheroan panahon sa Adlaw sa Mga Minatay kaniadto. Maayo gani, kay panahon sa pagka-gobernador ni Gwen Garcia sa Sugbo, iyang gipanindot ang Cebu South Bus Terminal, diin ang kahabog nga kalbaryo nga giantos sa mga pasahero kaniadto, dili na ma-feel sa mga biyahidor karon.
Naobserbahan, nga panahon sa Kalagkalag, ang mga tagtungod magdala gyud’g pagkaon didto sa lubnganan sa ilang minahal. Dili lang mangaon. Mag-inom sab. Kay alang nila, kining maong adlaw gigahin para makigsawo-hugoyhugoy sa mga kalag nga ilang giduaw. Nga kining adlawa, gikonsiderar nila nga Pasko. Busa, angay lang maglipay uban sa mga patay.
Bitaw, kining maong adlaw usa ka Pasko alang sa mga Minatay. Mao, nga ato silang halaran og mga butang nga makapalipay sa ilang kalag. Nga sa ato pa, mga pagkaon, ilimnong makahubog, karaoke ug paghudyaka sulod sa sam-ang, dili ni maoy ilang gikinahanglan. Kay kining tanan para lamang sa lawas.
Timan-i, nga sila wala nay lawas. Kalag na lang. Busa, angay nga ang atong iregalo kanila ning adlawa, ang gasa nga makabusog sa ilang kalag. Ug unsa ba kini? Of course, ang ato ra gyung pag-ampo ug pagpamisa alang sa ilang kaluwasan dili lang ning Adlaw sa mga Minatay, kondili, kada adlaw gayod!
Angay hinumdoman, nga kining Adlaw sa mga Minatay ug Kalagkalag, dili Pasko sa Kalipay. Kondili, Pasko sa Kasakit. Ang Pasko sa Kalipay, sa Disyembre 25 pa.
- Latest