Drug test sa mga kandidato
Gisugyot sa Philippine Drug Enforcement Agency (PDEA) ang surpresa nga drug test sa mga kandidato sa umaabot nga eleksiyon. Apan ang maong sugyot gisalindot sa Malakanyang tungod kay makalapas kini sa Batakang Balaud.
Samtang maayo ang tumong sa PDEA sa paghimo sa maong sugyot, apan gawas nga illegal, lisod usab kini nga mapatuman kay una, unsaon man kini sa pagpatuman?
Kay surpresa buot bang ipasabot sa PDEA nga ilang kandadohan ang mga kandidato nga anaa sulod sa buhatan sa Commission on Election (COMELEC) aron ilang I-drug test? Ibutang ta nga gitugotan ang PDEA, mapugos ba niini ang mga kandidato nga dili gusto nga mopaubos sa surpresa nga drug test? Ang tubag sa COMELEC dili.
Wa gyud tinuoray mahimo ang PDEA kondili magpa-drug test ang mga kandidato tungod kay dili man kini makapugos kanila bisan pa og makamugna kini og pagduda nga basin og mga adik sila.
Hinuon kon ako pod ang kandidato, mobulontaryo ko sa pagpa drug test aron akong pamatud-an nga dili ko adik ug dili tiggamitan og gidili nga drugas. Himuon nako kining positibo alang sa kampanya sa akong kandidatora.
Niining umaabot nga eleksiyon mabinantayon na unta ang mga botante ug manuki-duki sa mga kandidato aron makasiguro ta nga dili makapili og adik ug ingon man kandidato nga gipundohan ang kandidatora sa salapi sa gidili nga drugas.
* * *
Kaniadtong adlaw nga Domingo, Oktubre 21, akong gilusad ang GERRY AUXILIO LIVE ON FACEBOOK nga inyo nang makita matag adlaw nga Domingo busa ako kamong giimbitahan sa pagsaksi niini. Sa unang episode maong atong na one on one ang kanhi Presidente sa nasud ug karon Speaker of the House of Representatives Gloria Macapagal Arroyo.
- Latest