Nagtampo nga si Harry Roque
KUMPIRMADO na nagtampo nga ang nagbitiw na Presidential Spokesman Harry Roque kay President Duterte. Ang dahilan: nagmukha siyang tanga dahil nang mag-presscon siya ay hindi nIya alam ang tunay na dahilan kung bakit wala ang Pangulo na nasa ospital pala!
Sabi ng Pangulo, hindi naman bawat kibot niya ay dapat niyang sabihin kay Roque. Tingin ko, maling katuwiran iyan. Itinalaga siyang Spokesman at kung hindi niya batid ang mga aktibidad ng Pangulo, ano ang ihahayag ni Roque sa nagtatanong na media? Magmumukha siyang “engot”. Spokesman pero hindi alam kung nasaan ang Pangulo?
Ang Pangulo mismo ang nagkumpirma na tinanggap niya ang resignation ni Roque na ang dahilan ay hindi siya sinabihan tungkol sa pagpapaospital ng Presidente.
Sa palagay ko, ginawa na lang dahilan yaon ni Roque pero sa totoo, matindi ang kanyang pagnanais na kumandidato sa pagka-senador sa darating na eleksyon ngunit ayaw naman ng Pangulo dahil balak siyang gawing press secretary kaugnay ng planong buwagin ang Presidential Communications Operation Office (PCOO).
Kaya ang ipupuwesto ng Pangulo bilang press secretary ay ang kanyang Chief Presidential Legal counsel na si Sal Panelo na siyang unang nagsabi kamakalawa na walang sakit na cancer ang Presidente base sa isinagawa sa kanyang colonoscopy at endoscopy.
Gagawin namang consultant sa Office of the Press Secretary si Sec. Martin Andanar. Kaya ayaw man ng Pangulo na tumakbo si Roque, makakabilang na sa mga kakandidato sa pagka-senador sa 2019 mid-term elections. Ang iba pa ay sina Presidential Political Adviser Francis Tolentino at Special Assistant to the President Bong Go habang tatakbo naman sa local posts sina Secretary to the Cabinet Leoncio Evasco (Bohol), TESDA director-general Gene Mamondiong (Lanao), DFA Sec. Alan Peter Cayetano (Taguig).
- Latest