Ang iyang piggy bank

Kini ang nakita ko nga hulagway sa dihang nagbasa ko sa coffee table book nga Panaw sa Parokya ni San Jose sa Mabolo Cebu City sa dihang gihimo namo ang Mission Appeal. Si Fr. Ian Fiel Balangkig ang nagtan-aw sa piggy bank nga dunay sulod nga mga kawarta alang sa ilang proyekto kaniadto. Dunay gipasupot nga mga pag-ampo. Timailhan lamang kini nga dunay mga tawo nga manggihatagon kaayo bisan pa man sa ilang kahagip-ot. Nagsakripisyo sila gumikan sa ilang dakong gugma. Dili sama sa uban nga nihatag sa ilang giisip nga sobra ug wala na kinahanglana. Sa atong panaw sa kinabuhi mahinungdanon kaayo ang paghatag uban ang kalipay ug gugma. Mao nga dako kaayo ang among pasalamat sa mga kaparian sa Mabolo ug sa parokyano niini. Kay kon wala pa mo dili unta mi makapaatop. Daghan ug daghan kaayong salamat.